Living Our Language_ Ojibwe Tales & Oral Histories - Anton Treuer [70]
[7] Mii dash gaa-pi-izhi-giiweyaan, omaa dash indaa-ani-wiiji’izhinizhaawigoo owidi Mashkimodaang ezhinikaadeg, miinawaa go ji-gikinoo’amaagooyaan. Gaawiin dash ingii-minwendanziin, miinawaa gegaa go ingii-inendam, “Imaa niin eta, imaa indayaa.” Noongom ezhi-gikendamaan ganabaj niin eta ingii-anishinaabew imaa. Gaawesh, gaawiin dash ingii-inendanziin gii-izhaayaan baanimaa sa wayaabishkiiwed akeyaa ginwaabamaawizod. Inashke dash, gaawiin ingii-izhaasii. Ingii-izhi-naanaagadawendam i’iw biboon i’iw endaayaang gii-ayaayaan. Inashke ingitiziimag imaa go nookomisag miinawaa ganabaj igo gii-izhichigewaad anishinaabewin, booch gaye niin daniziyaan. Anooj gegoo indani-gikinoo’amaagoog.
[8] Mii dash gegapii gaa-izhi-ayaayaan ji-maadanokiiyaan imaa gichimookomaaning akeyaa. Naa booch iidog gii-anokiiyaan, mii dash gii-maadanokiiyaan, 1939 ingii-maajaa. Anooj dash igo ingii-paa-izhaa ji-baa-anokiiyaan. Montana gaye ingii-paa-izhaa gii-paa-anokiiyaan, anooj igo i’iw gii-izhichigeyaan biinish igo apii gaa-nandamigooyaan ji-o-miigaazoyaan iwidi sa chi-agaamiing gii-kichi-miigaadiing.
[9] World War Two gii-izhinikaade. Mii dash apii gaa-maajaayaan gaye niin; ingoji go imaa 1942 ingii-maajaa. Sa naa chi-agaamiing ingii-paa-ayaa iwidi akeyaa Europe ezhinikaadeg. Mii iwidi gaa-paa-izhaayaan gii-miigaazoyaan gaye niin wiidookaazoyaan. Ingoji go niso-biboon ashi aabita ingii-ayaa imaa miigaadiing.
[10] Inashke dash miinawaa owidi gii-pi-azhegiiweyaan, gaawiin igo omaa gaa-tanakiiyaan, ingii-pi-izhaasii igo. Ingii-paa-ayaa miinawaa owidi Montana miinawaa ingii-paa-izhaa. Ingoji go, oon ingoji go gegaa midaaso-biboon gaawiin omaa ingii-ayaasii, omaa gaa-onji-ondaadiziyaan omaa.
[11] Mii dash gaa-pi-azhegiiweyaan. Mii dash miinawaa gii-maajiitaayaan dash indanishinaabewin, anishinaabewin—niimi’idiing miinawaa go anooj ingii-izhaa ji-baa-giigidoyaan. Miinawaa go ingii-naaniim. Miinawaa ingii-nagam.
[12] Inashke gaye gaa-ishkwaa-miigaazoyaan, ingii-nagishkawaa sa niitaa, Scott Headbird. Miish igo apane besho ingii-ayaamin. Besho ingii-wiiji’idimin, biinish igo apii gaa-ishkwaa-ayaad.
[13] Inashke gaye anooj igo ingii-izhichige. Ingiw chimookomaanag gaye ingii-kagwejimigoo gaye wiinawaa iidog ji-wiidookawagwaa miinawaa go eyaabojiiwaad sa gaye wiinawaa izhichigewaad. Haa anooj gegoo ingii-izhichige imaa akeyaa chimookomaaning.
[14] Gaawiin dash go wiikaa ingii-nagadoosiin i’iw isa anishinaabewin. Inashke dash omaa noongom, aanish naa, mii azhigwa gaa-ako-niizhwaasimidana-ashi-nisobiboonagak indapiitiz. Gegaa go imbwaana’ow. Mii dash noongom eta go izhichigeyaan anooj izhaayaan niimi’idiing gaye niin baa-wiidookaazoyaan sa ojibwemoyaan gaagiigidoyaan sa dibishkoo go wiidookawagwaa niijanishinaabemag. Inashke gaye, anooj gaye indizhaa baa-wiidookaazoyaan o’ow isa anishinaabe-nagamong, miinawaa go anishinaabe-anami’aang. Gaawiin awenen igo midewin-sh geyaabi indizhitwaasiin. Mii eta go apane dibaajimag a’aw isa gimanidoominaan miinawaa go akina iniw aadizookaanan.
[15] Inashke gaye noongom anooj indizhaa gaye imaa gikinoo’amaadiiwigamigong ganoonigooyaan sa iidog gaye niin ji-wiindamawagwaa sa ongow oshki-anishinaabeg miinawaa oshki-chimookomaanag mewinzha gaa-pi-izhichiged sa a’aw anishinaabe. Naaniibowa niwiindamaagoog sa ji-ojibwemoyaan. Gaawiin dash onisidotanziinaawaa. Booch igo indizhichige.
[16] Inashke gaye owe noongom akina chi-anishinaabe geyaabi eyaad, indigoo. Niizhobimaadizi go indawaaj, indaa-ikid. Gegaa go, aanish naa zanagad wii-anishinaabewi miinawaa wii-gichimookomaaniwiwag gaye wiinawaa. Booch gaye ji-gii-izhichigeyan chimookomaan-izhichigeyan gaye niinawind dash ji-anishinaabewiyaang akeyaa ji-izhitwaayaang. Haa ingod geget sa zanagad, maagizhaa go indaa-ikid miinawaa zhaaganaashiimong, “You try to lead a double lifestyle.”
[17] Inashke go, ingoji go inashke go naa niin. Haa mewinzha ingii-maajiitaa naaniimiyaan. Owidi go ingoji go gaa-ishwaasobiboonagiziyaan, mii