Living Our Language_ Ojibwe Tales & Oral Histories - Anton Treuer [74]
[3] Gaa-izhi-maajaad a’aw inini babaa-giiyosed. Megwaa ayaad imaa ogii-noondawaan awiiya biidaasamosed. Mii dash, ogii-paabi’aan ji-dagoshininid onow—maagizhaa gaye gii-inendam, waawaashkeshiwan. Wa, gaa-izhi-noogised ji-baabi’aad imaa, noomag igo gii-ayaa imaa. Miinawaa dash a’aw gaa-pi-izhaad imaa. Ho wa, wii-waabamaad onow chimookomaanan imaa chi-goshko’igod onow a’aw. Gaawiin wiikaa ogii-waabamaasiin chimookomaanan ji-bi-izhaang imaa.
[4] “Hey,” a’aw chimookomaan gii-piibaagid, “You see anything today?” Ho wa, maagizhaa gaye a’aw anishinaabe, ganabaj ogii-kosaan iniw chimookomaanan. “Ho, aaniish enendamaan ji-izhichigeyaan,” inendam wa’aw anishinaabe. “Mino-giizhigad noongom, eh,” gaa-izhi-inaad. Mii dash ezhi-ikidod a’aw chimookomaan, “Jeez, it’s a nice day out.” “Eya’,” ikido a’aw anishinaabe. Ogii-waabandaan dakonang baashkizigan. Gaawiin wiikaa ogii-waabandanziin i’iw baashkizigan. “Awegonen o’ow gii-takonaman,” gaa-izhi-gagwejimaad wa’aw anishinaabe. Ogii-kagwejimaan onow chimookomaanan. “Ya, it’s a good day,” ikido a’aw chimookomaan. Mii dash i’iw, booch igo abwezowag anishinaabe miinawaa a’aw chimookomaan.
[5] Miinawaa dash a’aw anishinaabe ogii-poodaan o’ow ojaanzhan imaa akiing i’iw, bingwiing imaa. Ishkwaa-izhichiged, miinawaa dash o’ow chimookomaan gaa-izhichiged—omoshwens ogii-poodaan o’ow jaanzhan imaa.
[6] Noomaya go ogii-inaan anishinaabe, “Hey,” ogii-inaan, “Akina gegoo ogoshkanaan a’aw chimookomaan,” odinaan.
Wenji-nibwaakaad Nenabozho
[1] Aabiding giiwenh o’ow babaamaazhagaamed a’aw Nenabozho enind, ogii-waabamaan biidaasamosed wiijanishinaaben. Mii dash o’ow, ogii-naazikaagoon iniw anishinaaben. “Nenabozho,” ikido anishinaabe, “Giwii-kagwejimin gegoo.” “Ahaaw,” Nenabozho gaa-izhi-nakwetawaad. “Aaniin wenji-nibwaakaayan,” ogii-kagwejimigoon iniw anishinaaben, wiijanishinaaben.
[2] “Haaw.” Nenabozho gaa-izhi-inendang wii-inaad iniw anishinaaben, wiijanishinaaben. “Apane sa niin niijii nimiijinan nibwaakaaminensan.” “Oon, dagish waabanda’ishin wendinaman onow nibwaakaaminensan. Gaye niin niwii-nibwaakaa.” “Haaw,” Nenabozho gaa-izhi-inaaad, “Daga wiijiwishin. Giga-waabanda’in wendinamaan onow nibwaakaaminensan.”
[3] Mii dash megwekob gii-izhi-izhaawaad imaa. Megwaa bimosewaad, Nenabozho gaa-mikang o’ow waaboozoo-miikanens. “Mii imaa wendinamaan nibwaakaaminensan,” ikido Nenabozho imaa miiginaad onow nibwaakaaminensan gaa-izhi-miinaad bezhig owiijanishinaaben—a’aw waa-kikinoo’amawind. “Daga zhakamon abezhig,” ikido Nenabozho. “Ahaaw.” Owiijanishinaaben gaa-izhi-zhakamod bezhig. “Ishte,” ikido owiijanishinaaben, “Gaawiin aawaasinoon nibwaakaaminensan. Waaboozoo-moowensan gosha.” “Enh. Enh,” ikido Nenabozho, “Miish o’ow gaye giin nibwaakaayan.”
Bebaamosed Miinawaa Gawigoshko’iweshiinh
[1] Apane babaamosed a’aw Nenabozho gii-pabaamose gii-ayaad omaa. Mii dash o’ow ani-babaamosed gaa-izhi-miikawaad onow binesiwan, onow gii-naganaawaad omaamaayiwaa omaa. Gaa-izhi-gagwejimaad, “Aaniish giinawaa ezhinikaazoyeg,” ogii-kagwejimaan a’aw Nenabozho. Mii dash, ogii-nisidotaagoon i’iw ayaawid. Mii dash, gaawiin ogii-nakwetawaasiigoon onow binewan. “Gaawiin giwii-pooni’isiinooninim. Aaniish ezhinikaazoyeg?” Mii dash binesiwag gaa-izhi-inaawaad, “Bine indizhinikaazomin.” “Oon. Inashke niin niizhing indizhinikaaz. Mii i’iw bezhig, Nenabozho indizhinikaaz. Miinawaa dash Bebaamosed gaye indizhinikaaz.” “Oon.” Gaawiin ogii-nakwetawaasiigoonaan Nenabozho. “Wiindamawishin ezhinikaazoyan. Niizhing akina awiiya adayaanaawaan izhinikaazowinan,” ogii-inaan Nenabozho. Mii dash iniw binewan, “Gawigoshko’iweshiinh indizhinikaazomin gaye niinawind,” gii-ikidowag.
[2] “Sate! Gaawiin giin. Onzaam sa go gibi-wiiji’ininim,” gii-ikido a’aw Nenabozho. Mii gaa-izhi-zhaagode’enid gaa-izhi-miiziinaad onow sa binesiwan. Mii dash gaa-izhi-maajaad a’aw Bebaamosed.
[3] Megwaa, bimised a’aw ikwe-bine, gaa-izhi-booniid imaa. “Wish,” ikido a’aw, “Awenesh gaa-toodooneg owe gii-miiziinegwaa?” “Nenabozho,” gii-ikidowag oniijaanisan. “Wha. Inashke niin ge-doodawag. Aaniish wenji-izhichiged?” “Ingii-kagwejimigoonaan