Living Our Language_ Ojibwe Tales & Oral Histories - Anton Treuer [11]
[4] Mii dash gaye niin imaa gaa-onji-maajiishkaayaan wendaadiziyaan. Waakaa’igaans ogii-ozhitoon imaa a’aw noosiban. Mii imaa gii-ayaayaang.
[5] Gaye dash o’ow isa ziigwang, o’ow apiitak, mii apii mewinzha anishinaabe gii-kozid noopiming izhi-gozi, gii-ozhitood o’ow, o’ow isa ziinzibaakwad mitigong ininigaadeg zhiiwaagamizigan. Mii gaa-ozhitoowaad. Mii iwidi gaa-taawaad, gaawiin waasa—gemaa gaye naano-diba’igan o’ow apii iwidi ingoji megwaayaak. Mii iwidi gaa-taawaad iskigamizigewaad.
[6] Mii miinawaa ishkwaa-iskigamizigewaad, miish imaa jiigibiig zaaga’eganiing Inaandagokaag, mii imaa gii-kabeshiwaad. Noongom miinawaa imaa gii-kabeshiwag gii-noojigiigoonyiwewaad waaswaawaad, ashiganan aajigwaawaad. Mii imaa gaa-tanakiid wa’aw, gaa-onji-bimaadizid a’aw anishinaabe mewinzha.
[7] Mii miinawaa giiwegoziwaad. Mii dash zhayiigwa gii-ozhiitaawaad o’ow isa gii-midewid anishinaabe. Akina ingoji gii-midewi aw anishinaabe—Odaawaa-zaaga’eganiing, miinawaa a’aw Waaswaaganing, miinawaa Mashkii-ziibiing, miinawaa iwidi Dewegishigamiing. Namanj ezhinikaadegwen i’iw, anishinaabewinikaadeg iwidi ishkonigan. Miinawaa go omaa ayi’iing gaye Wekonamindaawagaansing izhinikaadeg, miinawaa iwidi Metaawangaag, Bikoganaaganing—mii imaa gii-midewiwaad iko ingiw anishinaabeg mewinzha.
[8] Mii miinawaa ishkwaa-midewiwaad, mii dash miinawaa gii-sagaswe’idiwaad o’ow baakibii’ang o’ow zaaga’eganiing; gii-asemaakewaad onji-naanaagadawenimigoowaad manidoon imaa wenjishkaawaaniwenijin.
[9] Mii miinawaa ishkwaa-zagaswe’idiwaad, mii dash miinawaa ayiigwa o’ow isa gii-mawinzowaad onow editeg miinan, miskominan, godagaagominan, o’ow isa gegoo editenig. Mii i’iw gaa-mawinzowaad. Mii gaa-onji-bimaadizid a’aw anishinaabe mewinzha, gaye niin bi-de-gikendamaan. Mii dash i’iw.
[10] Miinawaa dagwaaginig, mii azhigwa gii-madaabiigoziwaad o’ow isa gii-manoominikewaad, manoomin gii-bawa’amowaad. Akawe gii-sagaswe’idiwag waa-manoominikewaad, asemaakewag o’ow isa zaaga’eganiing gii-kaagiijitoowaad o’ow isa manoomin wii-pawa’amowaad. Gaawiin awiiya gii-izhi-boozisiin. Akawe asemaan ogii-pagidinaan nibiikaang.
[11] Miinawaa gii-kiizhitood a’aw anishinaabe manoomin, akawe asemaan ogii-pagidinamawaan manidoon wii-izhi-miijisig i’iw manoomin. Mii gaa-miijiwaad. Mii akeyaa gaa-pi-izhi-waabamagig ingiw anishinaabeg ishkweyaang.
[12] Akina ingoji gii-izhaa gaye aw anishinaabe sa o’ow isa gii-paa-midewid. Gaye iwidi Odaawaa-zaaga’eganiing izhinikaadeg imaa Baatawigamaag, mii imaa gaa-tazhi-midewiwaad mewinzha anishinaabeg. Ingoji gaa-izhi-bimoseyaang gii-o-midewiyaang gii-nandomaakawaa noosiban o-wiidookaazod owidi wiidookawaad akiwenziiyan gaa-midewiwinijin. Niso-giizhigon ingii-tazhi-izhaamin gii-tagoshinaang. Mii akeyaa gaa-izhichiged a’aw anishinaabe ishkweyaang gii-naazikang o’ow isa gaa-onji-bimaadizid. Noongom gaawiin izhichigesiin a’aw anishinaabe bi-naazikang bi-onji-bimaadizid. Gaye o’ow midewiwin ogii-igoon a’aw manidoon, mii go gaa-ani-izhi-maamawookang a’aw anishinaabe o’ow isa maanangid, o’ow isa gii-onji-maajiishkaad mii gaa-ininang manidoo. Mii sa i’iw gaa-izhichigewaad mewinzha ongow anishinaabeg, gii-izhaawaad gegoo inakamigizid ingoji anishinaabe.
[13] Mii go gaye a’aw, a’aw isa dewe’igan gaa-pi-bagidinaajin a’aw meyagwed anishinaabe omaa akeyaa. Iwidi mashkodeng izhinikaadeg, mii iwidi gaa-onjiid a’aw meyagwed anishinaabe imaa Neyaashiing Misi-zaaga’eganiing izhinikaadeg. Mii imaa gii-pi-bagidinaad iniw dewe’iganan gaa-onji-maajiishkaanid anishinaaben. Mii imaa gaa-pi-onji-bagidinaad. Mii dash imaa gaa-onji-maajiishkaad aw anishinaabe. Gaye a’aw meyagwed anishinaabe, o’ow isa gii-aasamigaabawi’aad onow isa meyagwenijin chimookomaanan ogii-igoon wii-chaaginanigod. Manidoo