Living Our Language_ Ojibwe Tales & Oral Histories - Anton Treuer [12]
[14] Mii akeyaa gaa-izhichiged a’aw anishinaabe ishkweyaang. O’ow isa gaye niin gii-te-gitenimag gii-waabamagig gaa-izhichigewaad. Mii gaye niin imaa bangii wenji-gikendamaan o’ow isa izhi-inaadamawag anishinaabe. Gii-kikinoo’amawiwaad, mii a’aw Neweyaash akiwenzii gaa-izhinikaazod nimishoomisiban, mii a’aw gaa-waawiindamawid i’iw ge-ani-izhichigeyaan naadamawag anishinaabe gegoo. Gaawiin indaa-inaasiin. Gaawiin indaa-inaasiin gegoo gagwejimid. Mii eta go wiindamawag gegoo gaye wii-kikendang.
[15] Gaye onow izhinikaazowinan, anishinaabe-izhinikaazowinan, mii o’ow i’iw isa gii-kii’igoshimoyaan mewinzha gii-kwiiwizensiwiyaan. Mii imaa wendinamaan iniw, iniw isa anishinaabe-izhinikaazowinan. Noongom gaawiin gwech anishinaabe-izhinikaazowinan odayaanziinan. Mii i’iw wanitoowaad i’iw. Akina sa go gegoo owanitoon anishinaabe mewinzha gaa-pi-izhi-waabamagig.
[16] Gaye onow wiigiwaaman, gabe-niibin ongow ikwewag gii-ozhitoowaad onow, onow isa gaa-apishimowaajin anaakaning, gaa-izhi-wiindamawaajin. Miinawaa onow megwaa abakwang iniw wiigwaasan, mii apii gaa-mamoowaad gii-ozhitoowaad iniw, iniw isa wiigwaasi-abakwayan. Miinawaa ingiw aya’aa apakweshkweyag gii-iniibinaawaad ingoji ayi’ii wiigiwaaming. Mii imaa gii-aabaji’aawaad iniw agidigamish iniw wiigwaasan wiigwaasi-abakwayan. Mii akeyaa gaa-ozhitoowaad iniw, iniw isa gii-abiwaad.
Wenabozho Gaa-kiishkigwebinaad Zhiishiiban
[1] Wenabozho gii-pimosed bakade; gaa gegoo omiijisiin. Maajiibadaabiid zaaga’egan owaabamaan zhiishiiban gii-awi-bakaded omaa jiigibiig. Miish abezhig zhiishiib, “Zhiishiibidog!” odinaan, “Wenabozho madaabii. Naawij inaadagaag. Anooj izhiwebizi Wenabozho.”
[2] Wenabozho onoondawaan zhiishiiban. “Gaawiin nishiimeyidog! Imaa noopiming niwii-niimi’idiimin noongom onaagoshig.” Mii gaa-izhi-gopiid wiigiwaam imaa gaa-ozhitood waagaashkang. Wiigiwaam imaa badakidenig. Mii gaa-izhi-onapidood giboodiyegwaazonan, aasaakamig gaa-kashkapidood omaa o’ow bimoondang.
[3] Miish i’iw inaad zhiishiiban, “Nishiimenyidog!” Odizhi-inaan, “Nishiimeyidog! Mii akeyaa bemoondamaan,” ikido. “Nagamonan onow bimoondamaanen. Owidi Mooniyaang izhinikaadeg, mii iwidi wenjibaayaan. Miish omaa waa-onji-niimi’idiiyaang noongom noopiming.” “Apegish,” gii-inendam wii-nisaad iniw zhiishiiban, wii-amwaad bakaded.
[4] Gaa-izhi-gopiiwaad iwidi, zhiishiibag o-niimi’idiiwaad, biindigewaad imaa wiigiwaam. Megwaa oganoonaan, “Nishiimeyidog! Inga-nagam. Nishiimeyidog, bazangwaabishimok! Gego inaabikegon,” odinaan iniw zhiishiiban. “Omaa apii azhigwa maajiiyaan nishiweyaan.”
Nishiimeyidogwen, gego inaabikegon
Giga-mamiskoshkiinzhigwem
Yo weh heh heh
Yo weh heh heh
[5] Mii aangodinong giishkigwebinaad iniw zhiishiiban, “kwenk,” inwewan giiwenh. “Haa nishiimeyidog, mii go waa-inweyeg.” Nagamo, giishkigwebinaad. “Wenk.”
[6] Miish a’aw zhingibiz gaa-izhi-dooskaabamaad aaniin ezhichiged. Awenesh ingiw gaa-kiishkigwebinaawaad iniw zhiishiiban? Mii gaa-izhi-biibaagimaad zhiishiiban, “Hey zhiishiibidog! Gidishkwamigonaan Wenabozho. Giga-abwaanigonaan.” Aabita-zaagiziba’idiwaad ingiw zhiishiibag. Mii go giiwenh iniw zhingibizan gaa-waagaawinid omadaabiiba’igoon ini-daangishkawaad. Miish i’iw gaa-inaad, “Oon gidizhi-maajiikamigoog. Gaawiin a’aw iwidi, a’aw anishinaabe, giga-amwigosiin,” ogii-inaan zhingibizan. “Giga-mamiskoshkiinzhigwe gaye,” ogii-inaan. Mii wenji-mamiskoshkiinzhigwed a’aw zhingibiz.
[7] Mii gaa-izhi-ayaad Wenabozho.
[8] Mii gaa-maajaad, apii ziibiwan madaabii, bimoomaad zhiishiiban gaa-kiishkigwebinaajin, iidog iwidi waabandang wii-abwed iniw zhiishiiban. Imaa naa akawe gii-kiizhiitaad gii-nibaa aapiji giizizwaad onow zhiishiiban. Mii dash o’ow gii-nibaad.
[9] Mii dash awedig, ongow akandoowaagwen, “Akawaabin,” iniw gaa-inaajimaad, “inaabin.” Bwaanag ongow boonowag. “Wiindamawishin awiiya biidaaboonod.” Namanj apii nibaagobanen. Mii wiin waabamaawaad omaa bashkinedenig bwaanag. “Mii a’aw