Living Our Language_ Ojibwe Tales & Oral Histories - Anton Treuer [13]
[10] Omaa apii wiin gaye gweshkozid, a’aw mewinzha iidog igo minozogoban, onishkaad inaabid Wenabozho bangii odabwaan gii-mamoonid, mamigod iniw bwaanan. Mii dash ayi’ii gaa-izhi-nishkaadizid. Mii gaa-izhi-jaagizodizod, omaa apii maajaad. Mii dash o’ow gii-chaagizod, gizhiibazhed giiwenh omigiid. Mii dash onow mitigoonsan gaa-ani-izhi-ayaang.
[11] Mii dash i’iw gaa-ikidod: “Nishiimeyidog,” ogii-inaan, “a’aw anishinaabe omaa ge-ani-bimaadizid. Mii gaye ezhi-wiinineg apaakozigan, gaa-izhi-miinigoowaawiyeg.” Mii gaa-ondinang anishinaabe gaa-sagaswaadang apaakoziganan. Mii i’iw Wenabozho gaa-ozhitood i’iw.
[12] Mii inaadizookewaad ongow akiwenziiyag mewinzha.
Wayeshkad Gaa-waabamag Aadamoobii
[1] Wayeshkad, ayaaban a’aw chimookomaan, bimiwinigoojin a’aw isa aadamoobii gaa-izhi-wiinaawaajin. Miikana imbima’adoomin bezhig oshki-inini. Aazhaa noondawangid biidwewebizod, biidweweg gegoo. Mii dash gaawiin, ingwiiwizensiwimin. Ingii-segizimin dash noondamaang biidweweg omaa miikanaang.
[2] Gaawiin igo, noongom izhinaagwak onow miikanan, gaawiin gii-izhinaagwasinoon. Mii eta go onow; gitawaakwaa’igaadewan. Mii gaa-izhinaagwak iniw miikanan mewinzha.
[3] Mii eta bebezhigoganzhiig miinawaa dibidaabaanan gaa-izhidaabii’iwewaad chimookomaanag. Mii dash imaa gaye gii-noondawangid a’aw, biidweweg gegoo, mii gaa-izhi-bakeyaang gaa-kaazootawangid. Nimikigaazomin opime-miikanaang megwaa omaa go besho baa-ayaad ginwenzh wa’aw, wa’aw isa aadamoobii bemiwininang noongom.
[4] Ginwenzh wii-adima’wiyangid imaa gaa-waabamiyangid bimibizod, ingii-segi’igoonaan gii-piidwewed. Mii go wayeshkad gii-waabamag a’aw, a’aw isa aadamoobii izhi-wiinaajin anishinaabe mewinzha. Mii dash imaa gaa-onji-gaazotawangid gii-segi’iyangid.
[5] Mii dash imaa akawe minik waa-kaagiigidoyaan.
Nitamising Gaa-waabamag Makadewiiyaas
[1] Wayeshkad gii-waabamag a’aw isa makadewiiyaas aazhaa wiindamawaajin anishinaabe omaa oodenaang, omaa endanakiiyaan, gaye imaa gii-pagaboodegoziwaad ingiw makadewiiyaasag, oniijaanisan a’aw inini, wiiwan, gaa-pi-aanjigoziwaad omaa o’ow isa gaa-paapaagokozhiwewinini, mii i’iw a’aw makadewiiyaas. Ginwenzh omaa gii-tanakii Inaandakokaag, gii-paapaagokozhiwewininiiwid wayeshkad gii-waabamag a’aw, a’aw isa makadewiiyaas ezhi-wiinind.
[2] Imaa wiin gaye weweni ogii-inenimaan anishinaaben. Imaa gaa-tanakiinijin, gaawiin wiikaa gegoo omaa ayaasiin endaad inini. Gaye odaa-gii-inaan. Mii eta go anooj gii-inaajimod igaye aanawi ojibwemo gaye gii-kikinoo’amawangid i’iw isa ojibwemowin. Mii apii gii-oshki-waabamag a’aw isa mekadewizid bemaadizid. Iwidi chi-agaamiing akeyaa o’ow isa bezhig minis, mii iwidi gaa-onjibaad, a’aw makadewiiyaas ezhi-wiinaajin anishinaabe.
[3] Mii dash akawe imaa minik waa-kaagiigidoyaan.
Nandawaaboozwe Makadewiiyaas
[1] Aabiding bezhig inini ingii-wiiji’igoonaan baa-nandawaaboozweyaang. Waabishkiki imaa ayaamagad, mii imaa gii-ayaawaad ingiw waabishki-waaboozoog. Miish imaa gaa-inaad, “Mii omaa akandoon,” ogii-inaan, “Da-bi-naazikawaawag waaboozoog.”
[2] Miish imaa gii-naaniibawid aw makadewiiyaas. Gaawiin dash ogii-naazikawaasiiwaawaan ingiw waaboozoog, iniw anishinaabe gaa-wiiji’waad. Mii iwidi gii-naganaad gaa-pi-izhi-giiwed. Mii wenji-izhiwebizigwen a’aw makadewiiyaas.
Waabooz Gaa-piindashkwaanind
[1] Aabiding gaye mii go makadewiiyaas, mii go a’aw inini gaa-maajiinaad. Mii dash iniw waaboozoon gii-kijiigibinaad, gaa-izhi-biindashkwaanaad. Mii dash iwidi waa-izhiwinaagwen, mii iwidi gii-wenabi’aad iniw waaboozoon.
[2] Maajii-giiwewaad idash, bebimosewaad gaa-izhi-gaganoonaad, “Waabam awedi waabooz nemadabid,” ogii-inaan. Ginwezh wiin a’aw waabooz gaa-piindashkwaanind, ezhi-gaabawid imaa makadewiiyaas ezhi-baashkizwaad iniw—gaa-piindashkwaanaawaanijin waaboozoon.
Gaa-amwaawaad Animoonsan
[1] Ingoding iwidi Bwaanakiing gii-izhaayaan, gii-niimi’idiiwag iwidi anishinaabeg. Mii gaa-izhaayaan gii-waabamangidwaa wenaagoshing gii-wiisiniwaad.