• Choose a category
• All
• Classic-Fiction

By Root 425 0

gegoo omaa, gemaa gaye gegoo mashkikiwan. Mii sa omaa mayaajiiging gaa-tago-atoogwen, gii-agwanjitood iniw miinan. Gomaa apii gii-siigobiigin imaa gii-agwanjitood. Gomaa godandamaang indagonaa geget oshki-miinan iniw. Oshki-ayi’iin igo miinan gaa-izhinaagwak. Migwandagoon gaye wenda-minopogwadoon igo gaye.

[4] Mii gemaa gaye aanawi gikinoo’amawiyangid gegoo. Aanishinange ingii-kagiibaadizimin. Mii gaa-onji-gikendanziwaang gaye niinawind awegonen imaa gaa-atood, gegoo aano-gikinoo’amawiyangid a’aw mindimooyenh, mindimooyenyiban.

Ayaabadak Ishkode

[1] Mii go geyaabi wiin nenda-dibaadodamaan gegoo noongom ezhi-aagonwetang awiiya. Gaa-izhi-bimaadizid a’aw anishinaabe mewinzha, imaa gaye anooj aapiji gichi-mewinzha ogii-kikendaanaawaa gegoo waa-aabajitoowaad. Miish aya’aag, gichi-aya’aag, ingii-mawidisaanaanig indedeyiban iwidi endaawaad. Gii-tagwaagin igo omaa. Niinawind ingii-taamin Gaakaabikaang.Wiinawaash iwidi ishkonigan Misi-zaaga’iganiing gii-ayaawag indedeyiban iwidi gaa-taawaad. Miish o-mawidisangidwaa ingoding endazhindamowaad gegoo. Mii o’ow niwiiji’aawaagan gegoo ani-gagwedwed.

[2] Miish i’iw gii-tibaajimod indedeyiban i’iw. Mii go omaa wiigwaasing gaa-tazhi-onzamowaad iko gaye gegoo gii-chiibaakwaadamowaad, inaajimo. Maagizhaa gaawiin gaye aapiji, gaye aapiji indebwetanziimin. Inashke sa wiin, inashke jaagide wiigwaas ingoji ishkodeng. Miish iwidi, nimoonenimaazawaanaan onow. Akiwenzii, indedeyiban gii-ani-zaaga’amogwen. Namanj igo madwe-ganoozhiyangid iwidi.

[3] Agwajiing imaa gii-poodawegwen. Miish agwajiing iko gii-poodawewaad, mii igo anishinaabeg. Mii i’iw gii-poodawegwen imaa agaasishkodeyaa ishkode. Owii-takonaan i’iw makakoons. Biskitenaanganing igo izhinaagwad i’iw wiigwaasimakakoons. Mii i’iw nibi atenig. Gegaa go imaa gaye ingodoninj eko-biigwen i’iw makakoons. Gaawiin igo gii-michaasinoon. Gemaa gaye niiyoninj, niiyoninjiiskaayaa. Inigokwadeyaagwen. Ingodwaasoninj gii-akwaa. Miinawaa gemaa gaye nishwaasoninj gaa-apiitadogwen, apiitoonigod. Miish igo nibi atemagak. Miish imaa ishkode. Gaawiin gaye gichi-zakwanesinoon. Gaawiin gaye gichi-michaamagasinoon ishkode. Mii imaa ayagwanang i’iw wiigwaasimakakoons nibi atenig. Ingoding gegoo imaa ji-ganawaabandamaang, geget imaa gii-tazhi-ondemagad i’iw nibi.

[4] Miish waabanda’iyangid i’iw wiigwaasing iko gegoo gii-tazhi-giizizamowaad mewinzha ingiw anishinaabeg. Gaawiin gii-chaagidesinoon i’iw wiigwaas megwaa nibi ateg biinjayi’ii. Gaye, mii gaye wiinawaa gii-kikinoo’amawiyangid gegoo gaa-ani-izhichigewaad ingiw anishinaabeg gaa-ani-izhi-bimaadiziwaad.

Inday

[1] Gaawiin niin ingezikwenimaasiin a’aw nimishoomisinaaban, iniw indedeyiban gaa-oosijin. Mii eta go a’aw nimaamaanaaban ginwenzh gii-pimaadizi. Mii iniw indedeyiban omaamaayan. Miish a’aw benaadiziwobanen a’aw nimishoomisinaaban, a’aw indedeyiban odedeyan. Nibogobanen a’aw akiwenzii. Inashke gaawiin ingezikwenimaasiin gemaa gaye gaa-niizhobiboonagiziwaanen benaadizid. Ginwenzh idash gii-pizhishigozi a’aw nimaamaanaaban, nookomisiban. Mii go i’iw apane gaa-izhinikaanangid “maamaanaan.” Miinawaa, mii ezhinikaanangidwaa niinawind ingiw ganoonangidwaa ingiw nookomisinaanig. Mii azhigwa ginwenzh gii-pizhishigozid.

[2] Mii ingoding gaa-izhi-mikawaad, mii iniw ge-bami’igojin akiwenziiyan. Ayi’iin, ganabaj imaa akeyaa agamiing gii-onjibaa a’aw akiwenzii. Gii-panaadiziwan gaye wiin iniw gaa-wiiwijin. Agaawaa go ingezikwenimaa a’aw. Gii-izhaayaang imaa gii-ani-inind a’aw mindimooyenh, mii iniw a’aw dibaajimag akiwenzii. Gaye, mii gaye wiin gii-pizhishigozid. Ingoding-sh iidog azhigwa gii-wiijiiwaad iniw nookomisinaaban, mii iniw akiwenziiyan. Miish iw ingoding iizon gaa-izhi-wiidigendiwaad, gaa-izhi-wiijiwaawendiwaad.

[3] Geget iidog o’ow gegoo ogii-ayaan a’aw akiwenzii. Ingezikwenimaa wiin igo. Gii-wenda-onizhishiwan iniw gaa-odayijin bebezhigooganzhiin. Miinawaa gichi-gwanaajiwaninig gaye iniw odapikanan iniw. Wenda-gwanaajiwag ingiw bebezhigooganzhiig. Miinawaash igo gegoo gaye ingii-shawenimigonaan sa go a’aw akiwenzii i’iw. Mii i’iw nookomisiban azhigwa waa-kichi-aya’aawiwaad. Mii eta go gii-wiidookawaad