Living Our Language_ Ojibwe Tales & Oral Histories - Anton Treuer [24]
[4] Ingoding igo ogii-pizagaabiiginaan bebezhigooganzhiin. Agaashiinyi a’aw bebezhigooganzhiins. Wiikaa wawaabijiizi. Gagidagishin igo waawiyeyaag imaa gagidagishing. Miish i’iw apii ininamawid niin i’iw biiminakwaan bezagaabiiginaad iniw bebezhigooganzhiin. Miish i’iw gaa-izhid, “Mii a’aw giday,” indig. Wayaa gichi-minwendamaan niin odayiyaan. Aanishinange indedeyiban nawaj gii-nanaa’itood i’iw bebezhigooganzhiiwigaan. Igaye imaa ogii-ayaawaan odayan indedeyiban. Mii imaa gaye niin gii-asag a’aw. A’aw-sh, mii gii-igooyaan, “Giinish o’ow giga-ashamaa gaye gidoominaa gaye,” indigoo. “Giin giga-ganawenimaa giday,” indigoo. Miish i’iw, “Aaniish waa-izhinikaanad,” indigoo. Miish i’iw ganawaabamag indagonaa, “Giwaabandaanaawaadog iko awiiya zhishigagowed. Mii sa go gaa-izhinawag i’iw inaanzod a’aw bebezhigooganzhii. Aaniish, mii sa iidog i’iw Zhishigagowaan inga-izhinikaanaa.” Miish i’iw gaa-izhinikaanag a’aw inday—Zhishigagowaan.
[5] Aan, aabiding ganabaj eta ingii-pimoomig. Gaawiin ingii-ayaanziimin gegoo i’iw bimoomigoo-apabiwinang. Mii go mitaawigan gaa-izhi-bimoomigooyaan azhigwa. Aaniish, ingii-agaashiny i’iw apii imaa gegaa gaa-naano-biboonagiziwaanen apii gii-odayiyaan. Mii i’iw inday Zhishigagowaan gaa-izhinikaanag. Gaawiish igo, inashke gaawiin nimaamaa odinendanziidog gaa-inikaagobanen a’aw inday. Gemaa go gaye azhigwa gii-taawag indedeyiban odayan gaye wiin gaa-tago-adaawaageyaang. Inashke gaawiin ingii-ayaasiimin endaayaang. Mii gaye ginwenzh opime-ayi’ii gii-paa-anokiidog indedeyiban gii-naganangidwaa ingiw bebezhigooganzhiig. Mii imaa gaye, gemaa gaye gaa-adaawaagegwen indedeyiban iniw odayan miinawaa go gaye niin a’aw inday. Gaawiin naganag aapiji ingezikwendanziin i’iw.
Gibaakwa’igan Dazhi-anishinaabeg
[1] Ingagwejimigoo dibaajimoyaan akina wenjibaayaan, ayi’ii sa iwidi Misi-zaaga’iganiing wiin gomaa indibaajimotaagooyaan dash o’ow ingii-tazhi-ondaadizinaadog omaa akeyaa Gibaakwa’iganing akeyaa Nesawegamaag ezhinikaadeg. Mii iidog imaa gii-wiindamawipan indedeyiban gaa-tazhi-ondaadiziyaan iidog. Mii azhigwa a’aw indedeyiban wiin iwidi akeyaa Azhoomog ezhinikaadeg, mii iwidi akeyaa gaa-tazhi-nitaawigid wiin. Gayesh i’iw imaa azhigwa mayaajii-wiiji-ayaawaad iniw nimaamaayibanen. Mii iwidi gaa-izhigoziyaan iidog iwidi, iwidi akeyaa Aazhoomog ezhinikaadeg. Gaawiin iwidi Aazhoomog ingii-ayaasiimin. Jejajiibaan igo gii-ayaawag ingiw, ingiw sa go niningwezhinaningodwewaanagiziwaad.
[2] Inashke a’aw nimishoomisinaaban a’aw. Ayi’iing iwidi jiigibiig i’iw Nenaandago-ziibi ezhinikaadeg, mii iwidi gii-ayaad wiin a’aw nimishoomisiban. Mii iwidi gii-ayaawaad iniw gaye wiin oniijaanisan igaye. Gaye, mii indedeyiban gaa-tedeyijin miinawaa go inzigosiban miinawaa go bezhig ninzhishenh. Nimishoome gii-ayaa iidog. Gaawiin ingezikwenimaasiig.
[3] Ayi’iing idash iwidi jiigi-ziibi, gaye niinawind igo ziibi, mii iwidi gaa-taayaang gibaakweg. Gii-kaanjweba’igeng iko ogii-kagiibaakwaanaawaan chimookomaanag ziibiwan, zaaga’iganiin gii-ozhitoowaad dash miinawaa mitigoon gii-misaaboonaawaad. Mii imaa gii-ayaamagak iidog gibaakwa’iganing, gibaakwa’igan. Miish i’iw wenji-izhinikaadeg Gibaakwa’iganing. Mii iwidi gaa-tazhi-nitaawigiyaan gaye niin azhigwa. Mii iwidi apane gaa-taayaang.
[4] Iwidi Gibaakwa’iganing ezhinikaadeg, ayi’iing wiin i’iw giigoonh-odena, iwidi gabeshiwag. Odenawens Jekaakwaag ezhinikaadeg gii-izhinikaade. Chimookomaanag wiinawaa Markville ogii-izhinikaadaanaawaa—Markville, Minnesota. Mii i’iw ganabaj nishwaaso-diba’igan i’iw apii gii-tagon i’iw odenawens. Miinawaash imaa akeyaa aazhawayi’ii adaawewigamigoons gomaa gaye ayaamagad. Chimookomaanag odizhinikaadaanaawaa Duxbury. Anishinaabeg dash wiin igo gezikwenimagwaa ongow mewinzha, Eko-biising gii-izhinikaade. Izhinikaade sa go noongom.