Living Our Language_ Ojibwe Tales & Oral Histories - Anton Treuer [37]
[5] Dibishkoo go i’iw gii-ani-miinaawaad; iwidi ingiw bwaanzhii-dewe’iganag imaa wenji-ayaawaad, weweni ji-ganawendaagozinid iniw anishinaaben. Mii imaa wenji-ayaawaad ingiw dewe’iganag. Biinish igo iwidi akeyaa gii-izhaawag akeyaa iwidi akeyaa bangishimog gii-pi-maajaawaad bangishimog gii-izhaawaad akeyaa. Mii eta go bezhig i’iw apane ezhaad a’aw dewe’igan iwidi akeyaa wendaabang. Gaawiin daa-gii-azhegiiwesiin imaa, iwidi.
[6] Imaa gaye wiinawaa ingiw Waawiyegamaag, mii imaa gaye wiinawaa ongow anishinaabeg gii-shawenimaawaad anishinaaben iwidi Waawiyegamaag. Biinish igo iwidi akeyaa iwidi waasa gii-izhi-izhaawaad dewe’iganag gii-kikinoo’amawaawaad gaye wiinawaa gii-shawenimaawaad, gichi-ganawenimigoowaad iniw dewe’iganan. Mii gaa-onji-ayaad dewe’igan ji-wiidookawaawaad zhawendaagozinid anishinaaben.
[7] Mii sa go gaa-onji-gikendaasoyaan gaye niin gaa-wiindamawid a’aw akiwenzii, a’aw moozhag gaa-waawiindamawid gii-agaashiinyiyaan. Gaawiin go ingii-izhi-mikwendanziin go wiin. Iwidi go wiin-sh chi-aya’aawiyaan, niin maagizhaa gikendamaan iko wiindamawid akiwenzii. Dibishkoo go bijiinaago, awasanaago indinendam ko gii-waawiindamawid a’aw akiwenzii, akeyaa gaye manidoo akiwenzii gaa-wiindamawid akina go gegoo omaa miikana gaa-agoojigewaad, gaa-adaawaagewaad wiigwaasi-mazinigwaasowaad. Miish gegoo gii-pi-maajaawaad bi-izhaawaad adaawewigamigong. Mii go akiwenzii ganoozhid, “Hey! Omaa bi-izhaan. Omaa bi-izhaan, ishkwaaj biindigen. Wewiib bi-izhaan omaa.” Namadabiyaan, “Haa namadabin. Aniibiish minikwen.” Mii eta go aniibiish minikwed. Mii go omaa ashamigooyaan, niibowa ashamigooyaan gaye.
[8] Mii gaa-izhi-waawindamawiwaad i’iw aaniin ji-gikendaasoyaan, o’ow gaagiigidoyaan imaa niimi’idiing. Ingii-waawiidookawaag inendaagoziyaan, iniw manidoon o’ow gii-waawiindamawiwaad. Mii moozhag. Mii omaa gii-izhi-aajimod a’aw akiwenzii bezhig. Haa ani-maajaayaan, mii go miinawaa gomaa apii miinawaa ani-izhaawaad dagoshinowaad ani-agoojigewaad. “Hey, omaa bi-izhaan. Omaa bi-izhaan, nishiimens.” Indizhinikaanigoog ishkwaaj. “Hey, omaa bi-izhaan.” Mii go omaa biindigeyaan miinawaa imaa. Gaawiin igo wiigiwaamens—wiigiwaamiin ogii-ayaanaawaan. Mii go omaa, “Haa, namadabin. Aniibiish minikwen.” “Gaawiin ganabaj igo niin.” Ingii-naanoogishkaa gaa-wiindamaagooyaan akina. Gaawiin gaye naasaab indibaajimotaagoosiin. Mii booch igo gii-kikendamaan igo, miish ginwenzh. Gaawiin ingii-mikwendanziin. Imaa-sh ezhi-gichi-aya’aawiyaan ezhi-ani-gikendamaan gaa-waawiindamawiwaad ingiw akiwenziiyag. Miish i’iw wenji-gikendaasoyaan gaye niin o’ow. Gaawiin go akina go ingikendanziin. Maagizhaa gaye ingoding booch inga-gikendaan i’iw gaa-wiindamawiwaad ingiw akiwenziiyag.
[9] Mii sa go ani-maajaayaan, “Wayaa niin indebisinii.” “Hey gomaa indaakoshkade,” indinendam ko mooseyaan, “niibowa dash.” Gaawiin indaa-ikidosiin. Apiichi-apiitenimadwaa ingiw waawiindamokwaa, biinish go gii-miinadwaa gidasemaan ishkwaa-waawiindamokwaa. Ishkwaa-wiindamaagooyaan gegoo, o’ow isa ani-maajaayaan miinawaa indaakoshkade, wii-ani-maajaayaan. Booch igo miinawaa chi-ganoozhid a’aw akiwenzii, gaye aaniish gaa-onji-izhichigewaad ingiw akiwenziiyag.
[10] Maazhaa ingii-kikenimigoog miinawaa naagaj ji-ani-biinag dewe’igan ji-ani-gikendamaan. Mii imaa gaa-onji-waawiindamawiwaad ingiw, o’ow isa akiwenzii gii-waawiindamawid a’aw. Gaawiin igo wiinawaa apane ingii-kaganoonigoosiin. Aya’aa Dedaakam, aya’aa abezhig akiwenzii Medwe-ganoonind gii-izhinikaazod, mii gaye weweni gaa-wiindamawid ge-izhiwebak dewe’igan sa go. Weweni iko gii-maajiibizoyaang gii-niimi’idiiyaang owidi Waawiyegamaag. Mii go ani-maajaayaang, ani-maajii-gaagiigidod a’aw akiwenzii. Mii iwidi booch igo dagoshinaang, mii iwidi geyaabi waawiindamawid o’ow isa dagoshinaang, wii-kabaayaang. Zhebaa akawe gii-ayaa—gaawesh. Mii gaa-izhid akiwenzii. Mii go miinawaa maajaayaang,