• Choose a category
• All
• Classic-Fiction

By Root 422 0

gaawiin go naasaab miinawaa inaajimotaagozisiin, apane go bakaan gii-inaajimotawid. Mii go omaa dagoshinaang, mii go omaa geyaabi gii-wiindamawid a’aw akiwenzii akeyaa gaa-izhi-gikendaasod a’aw akiwenzii. Mii i’iw wenji-gikendamaan ingiw dewe’iganag gaye niin gaa-onji-ininendaagoziyaan ji-bimiwinag a’aw dewe’igan, maagizhaa gikendaagoziwaanen o’ow ji-gikendamaan gegoo akiwenziiyag gaa-waawiindamawiwaad. Booch igo ingii-kaganoonigoog ingiw akiwenziiyag, akeyaa gaye bezhig akiwenzii.

Zhimaaganish Ezhinikaazod

[11] Bezhig oshki-gwiiwizens gaa-wiijiiwag apane—niwiijii’idiimin sa go, ingikinoo’amaagoomin gaye. Aabiding imaa naaniibawiyaang jiigikana, haa imbaapi’idimin, gaagiigidoyaang imaa imbaapi’idimin. Aanish bimosed a’aw Zhimaaganish gii-izhinikaazod a’aw akiwenzii, haa sa naa miinawaa imbaapi’idimin maanoo ji-ikidoyaang. Wa, bimosed a’aw akiwenzii, wa gwashkibagizo imaa gaa-waabamiyangid. Zaka’onan, miish iniw dekonang gaye. Ezhi-waabamiyangid i’iw, ingii-inenimigoonaan gii-paapi’angid. “Aaniin dash wenji-baapiyeg,” indigoonaan a’aw akiwenzii. Waa-ayiizhino’wiyangid i’iw, ingii-segizimin sa go. Gaawiin ingii-inaasiin a’aw akiwenzii i’iw apane gaa-inaabamiyangid i’iw, gaa-pi-izhi-maajii-apa’iweyaan daa-awi-giiweyaan. Gaawiish. Wiindamawagaa indedeban nimaamaam eyaawaad, “Wiin a’aw akiwenzii, niinawind a’aw Biindige-gaabaw ingaagiigidomin jiigikana. Imbaapi’idimin miinawaa bimosed a’aw Zhimaaganish, a’aw ingii-inenimigoonaan ji-baapi’angid, gii-ikido. Gaawiin gidaa-baapi’aasiig gichi-aya’aag; mii gaa-inendamaan i’iw. Miish, ingii-nishki’igoonaan a’aw akiwenzii. Miish miinawaa waabamiyangid mitigong.” “Gaawiin dash,” wiindamawid nimaamaam. “Ambe wewiib, wewiib asemaan iwidi awi-miizh a’aw akiwenzii wiindamawad gii-paapi’aasiwad. Wewiib igo. Maajaan igo. Wii-piiskaayan igo dash, maajaan igo endaad igo. Biindigen,” gii-ikido.

[12] Naa miinawaa-sh biindigeyaan wii-paabaagoo’igekeyaan biindigeyaan igo jiishkimag namadabid a’aw akiwenzii. Wa, apane ge-inaabamid a’aw, o’ow debaabandang ozaka’on. Aan wiindamawag, “Hey Zhimaaganish. Gaawiin gibaapi’igoosiin iwidi. Miinawaa ingii-paapi’idimin.” Imaa go miinind asemaan a’aw, “Gaawiin ji-maanenimigooyaan igo gibaapi’isinoon i’iw.” Wa, mii a’aw akiwenzii gii-paapid gaye. “Ho, ho, ho, ho, noozis. Weweni, weweni gaye weweni wii-pi-izhichigeyan,” ikido. “Gaawiin gigikenimisinoon. Weweni giinawaa gigii-paapim, indinendam,” gii-ikido a’aw akiwenzii. Mii bijiinag gii-minwendamaan gii-ani-giiweyaan. Wa, naa imbaabaapi’aa miinawaa nagamoyaan ani-maajaayaan. Mii go bijiinag gii-miinag asemaan. Gaye go, miish imaa gii-wiindamawid a’aw indedeban miinawaa nimaamaaban, “Gego wiikaa aapiji gaye ingoji niibawiyan baapi’aaken ingiw akiwenziiyag miinawaa mindimooyenyag,” gii-ikido. “Gichi-apiitenimad gichi-aya’aa,” gii-ikido. “Gaye ingoding igo giga-ganawenimigoog gichi-aya’aag. Gegoo giga-ganawenimigoog,” ingii-ig. Miish i’iw gaa-izhi-debwewaad.

Gekendaasojig

[13] Miish i’iw wenji-gikendaasoyaan gaye niin. Indinaa sa gikendaasoyaan. Gaawiin go akina gegoo indaa-gikendanziin. Indinendam igo debinaak, debinaak o’ow inendamaan wiidookawiwaad ingiw manidoog wii-kaagiigidoyaan. Gegoo gaa-wiindamoonaan i’iw gegoo biindigeyaan imaa niimi’idii’wigamigong niimi’idiing. Gaawiin gegoo indaa-gikendanziin igo. Niwiidookaaz sa nagamong. Ingoding sa go ininendaagoziyaan iwidi wii-gaagiigidoyaan, mii iwidi bezhig gikendamaan waa-ikidoyaan. Gaawiin memwech indaa-mikwendanziin waa-ikidoyaan, mii go ba-izhi-dagoshinaan imaa gaye waa-inaajimoyaan.

[14] “Gegoo naagaj igo gaye giin ge-izhiwebiziyan, maagizhaa-sh, mii go gaye ezhiwebiziwanen azhigwa, mii go. Giga-zhawendaagoz i’iw bimiwinad dewe’igan enaginzoyan gidewe’igan dibendaagoziyang i’iw oshkaabewisiwiyan. Mii gosha gii-kikendaagwak ji-minoseyan. Gigikendaanan gaye giin iniw nagamonan. Akina go weweni gigikendaan gaye. Gidinendaagoz ji-gikendaman iniw nagamonan miinawaa ge-ikidoyan sa go. Mii i’iw wiidookawag inendaagoziyan. Gimanidoog giwiidookaagoog gegoo go wii-izhichigeyan.” Mii gaa-pi-izhid akiwenzii, gichi-aya’aa.

[15] Ingii-kaganoonigoog weweni ingiw