Living Our Language_ Ojibwe Tales & Oral Histories - Anton Treuer [40]
[19] Baamaa naagaj ingii-pi-miinigoog. Ingii-meshkwadabi’ig iwidi ko bimiwinag. Iwidi akeyaa wendaabang akeyaa ingii-neskwaakide’wig akeyaa. Ingii-namadab ajina go omaa, mii i’iw. Miish a’aw Naawigiizis ezhinikaazod, maajaawan odedeyan. Mii a’aw dayewe’iganid a’aw gaa-izhinikaazod akiwenzii. Miish i’iw gaa-tewe’iganid. Booch igo inga-mikwenimaa a’aw naagaj. Miish i’iw gaa-izhi-ikidod, “Wiin odaa-bi-miinaan iniw Naawigiizis ezhinikaazod odewe’iganan.” Miish gaa-izhi-ikidod, “Gaawiin niin indaa-aashki’aasiin ji-miinag a’aw dewe’igan; indawaaj igo bezhig omaa debinendaagozid. Asig,” gii-ikido. Mii sa a’aw ogichidaakwe bezhig gaa-ikidod niin maajii-asigooyaan. Miish imaa gii-aandabii’igooyaan. Aagawaat gaa-izhinikaazod a’aw gaa-wiidabimag. Mii gaye gii-wiidabimag o’ow isa gii-inendamaan igo ji-wiidookawid a’aw nitam, a’aw nitam akiwenzii gii-maajaad imaa gii-namadabii’igooyaan. Gaye a’aw go nitam gaye, mii nitam waa-kaagiinisigeg, gekoonisookideg. Mii iwidi wendaabang akeyaa; mii iwidi gii-namadabii’igooyaan.
Dewe’igan Meshkawiziid
[20] O’ow dash gegoo ezhi-manidoowaadiziwaad gidewe’iganag imaa ko gii-anokiiyeg daashkiboojiganing imaa awas akeyaa agaaming gemaa gaye anokiiyaan, miish i’iw. Miish a’aw nabagisag wasigone-ombinag, ingii-chagitaan bikwan. Mii gaa-izhi-bwaanawitooyaan. Mii gaa-izhi-mashki’inigooyaan gaa-izhi-waabamag. Hay’! Mii i’iw giizhiitaamagak dibi go. “Gaawiin wiikaa gidaa-gashkitoosiin iwidi ji-ayaayan. Giga-mashki’inin,” miish imaa bi-niimi’idiing. Mii imaa. Mii jibwaa-dibinendaagoziyaan ingiw dewe’iganag imaa bi-biindigeyaan imaa dash niimi’idiing. Mii a’aw medwewed biindigeyaan, omaa babaa-naazikawid a’aw Aagawaat megwaa gii-pi-maajiid a’aw akiwenzii gaa-inaabishkawagiban. Mii dash i’iw bezhig a’aw Nitamigooneb gaa-izhinikaazod a’aw akiwenzii. Nitamigooneb gii-izhinikaazo, geyaabi go gii-inaabishkawag. Miish gaa-izhi-izhid, “Haaw. Dibendaagozin imaa. Gigagwejimin ji-dibinendaagoziyan. Haaw sa giin inakomag.” Mii gaa-izhid a’aw akiwenzii, “Gego gaagiigidoken wii-kagwejimigooyan ji-dibinendaagoziyan dewe’igan. Giniijaanisag miinawaa gidinawemaaganag weweni da-dibendaagoziwag. Mii sa go gaawiin da-maazhisesigwaa, weweni ji-ani-bimaadiziwaad.”
[21] Gayesh indaakoz. Imbikwan indaakoz. Wayaa! Mii ezhi-bwaanawitooyaan wii-mino-ayaayaan, azhigwa miinawaa go gaye wii-izhi-ayaayaan bimoseyaan. Aanish naa, mii gaa-wiindamawid a’aw Mashkiin. “Gaawiin wiikaa giga-minosesiin gibikwan,” ingii-ig. “Aaniish iniw nagamonan i’iw eko-nising, haa gidaa-niimi’aawaa,” ikido. Medwe-ganoonind igo oshki-niimi’iweng imaa. “Niimig.” “Haa sa ezhi-gashkitooyaan ji-niimiyaan,” indinendam. Ingii-naaniim iko. Ingii-pwaanzhii’igoo naaniimiyaan. “Haa niimig,” ikido. “Nagamon gegaa imaa giizhibaashiwan imaa,” indig. Gegaa go, gegaa go ingashkitoon bimoseyaan, anooj igo aakoziyaan imbikwan oseyaan. Zhayiigwa apii go niizhing gaa-izhibaataayaan, aanish miinawaa imaa go bakaadendamaan imaa dash gaa-izhi-gashkitooyaan miinawaa naaniimiyaan. Azhigwa omaa nising ge-izhibaashkaayaan o’ow gaa-niimi’igooyaan, weniban aanh miinawaa gii-aakoziyaan. Indig wa’aw, “Wa, hay’!” Wii-paa-apagizoyaan igo ani-mino-ayaayaan sa go omaa bakaadendamaan i’iw aandiish sa go naa indigooban a’aw Mashkiin. Indig a’aw, “Gaawiin izhisinoon gibikwan. Mii giizhiitaamagak,” ingii-ig. Mii i’iw Mashkiin inind. Mii gaa-izhi-gagwejimag a’aw akiwenzii, niyawe’enh gii-wiiyawe’enyid ko gii-abiigizigewininiiwid. Mii imaa Giiyoganebii gii-izhinikaazod, mii a’aw gaa-niimid. Haaw sa naa gaa-izhi-ayaayaan imbikwan. Indinaa imbwaaniwinaaban. “Enh,” indig. “Mii i’iw dewe’igan, dibishkoo ingii-nanaandawi’ig,” gii ikido. Miish i’iw gii-kikendamaan i’iw gegoo ingiw dewe’iganag