Living Our Language_ Ojibwe Tales & Oral Histories - Anton Treuer [78]
[2] Ingii-tanakiimin imaa megwaayaak, besho Gwiiwizensiwi-zaaga’iganiing, endaawaad niibowa anishinaabeg. Aangodinong ingii-izhaamin imaa ji-mawadishiweyaang, gii-misawendamaan ji-dazhitaayaan gaa-ayaawaad abinoojiinyag. Mii dash igo gii-saaga’amaan ji-bimoseyaan imaa mitigokaag wiiji-ayaawagwaa indayag. Ingii-nisaanaanig akakojiishag ji-amwigod iniw animoshan. Aapiji go gii-minwendaagwad. Gii-pabaaminizha’waad waawaashkeshiwan, miinawaa go gaye ingii-akwaandawe imaa mitigong.
[3] Nookomis ogii-ayaanan biizikiiganan ji-biizikamaan gii-pabaa-odaminoyaan agwajiing. Mii dash igo ko gii-minwendamaan ji-zhaashaaginizideyaan. Apane ko ingii-bimaazhagaame, bakobiigwaashkwaniyaan imaa zaaga’iganiing gemaa gaye imaa ziibing. Mii sa go gii-pimaadagaawaad indayag igaye. Ingii-izhi-anishinaabe-wiinaag akina indayag. Aanind odayaanaawaan zhaaganaashiimo-wiinzowinan, mii dash igo anishinaabe-inwemagak, dibishkoo go Jaanish, wiindeg Jaan zhaaganaashiimong. Bezhig gii-izhinikaazo Mazina’ige.
[4] Oon, gagiibaadadoon akina owiinzowiniwaan, aanind zhaaganashiimong, aanind anishinaabemong.
[5] Nimikwendaan gii-agaashiinyaan, naanaagadawendamaan gaa-izhichigeyaan i’iw apii. Apane ingii-izhaa imaa megwaayaak ji-odaminotawagwaa indayag. Apane ko ingii-wiindamawaag ingiw i’iw isa gaa-wiindamawangidwaa ko anishinaabe-animoshag—“mawinazh!” Miigaazowag igaye.
[6] Aabiding ninzhishenyiban ingii-waabamig imaa noopiming. Miinawaa go gaye gii-ayaayaan imaa mitigong.
[7] Mii sa indayag gii-ayaawaad imaa ogidakamig, miish igo ayaayaan mitigong. Ninzhishenh gii-noogishkaa imaa gaa-odaminoyaan gaa-izhi-bimosed imaa noopiming. Gii-miishidaamikamban, dibishkoo go aanind anishinaabeg. Mii go apane ezhi-debibinid, ingii-miishi-zinigonig indengwayang, mii go gaye wiisagendamaan. Ingii-paazagobinaa, miigaanag. Miish ezhi-ikidod a’aw, “Giga-wiidigemin netaawigiyan. Inga-webinaa niwiiw.” Ingii-tebwetaag. Ingii-maw, miigaazoyaan igaye, wiikobidooyaan odiinisizisan miinawaa go gaye baazagobinag.
[8] Bezhig giizhig ingii-tebibinig ninzhishenh ishpi-ayaayaan mitigong, ezhi-ikidod, “Inga-akwaandawe imaa ji-wiiji-ayaawinaan, ji-wiidabiminaan. Giwii-wiidigemin niin sa mitigong.” “Gaawiin igo,” ingii-ikid. Miish ezhi-gagwejimid, “Aaniin danaa?” “Mawinazh!” gaa-inagwaa indayag.
[9] Mii dash ezhi-ikidod, “Enh, gaawiin inzegizisii ji-miigaanagwaa gidayag.” Ingii-anoonaag indayag maajii-naazikawaawaad mitigong. Akina indayag ozhiitaawag ji-mawinanaad. Gaawiin daa-gii-kiimiisii ninzhishenh; miziwe gaa-ayaawaad indayag. Gaawiin idash owii-mawinanaasiiwaawaan biinish anoonaasiwagwaa.
[10] Endaso-mamaazikaad, gii-niikimowag, waabanda’aad odiibidaniwaan. Miish apii bezhig animosh gii-tebibinaad ogiboodiyegwaazonan. Miish ezhi-aazhikwed, “Tayaa! Geget igo indakwamigoog ingiw.” “Geget oganawenimaawaan ingiw animoshag eyaad,” baanimaa owiindamawaawaan indinawemaaganinaanig.
[11] Ninzhishenh noonde-bi-wiidookawaa. Nimishoomisiban gii-pi-naagozi, zaagajiwed ji-bimaaji’aad ninzhishenyan. Gaawiin igo ingii-wii-wiidookawaasii. Ingii-shazhiibitam. “Anoozh gidayag ji-booni-mawinanidwaa,” indig ninzhishenh anishinaabemong, “Wiindamaw gidayishag.” “Gaawiin,” indinaa. Ingii-wenda-majiw. “Mawinazh!” Ingii-ikid. Gii-niikimowag, naazikaagewaad besho, ezhi-dakwangewaad.
[12] “Aaniin,” madwe-ikido nimishoomis. Mii dash igo ezhi-ikidod ninzhishenh, “Bi-naadamawishin.” Gii-saagajiwe nimishoomis, biidood zaka’on, mii go gaye zegi’aad, oshaakawaad iniw. Ishkwaakamigak baanimaa ingii-noondawaa wiindamawaad nookomisiban, “Gego babaamendangen apane mitigokaag nazhike-baa-ayaad.”
Gii-kinjiba’iweyaan
[1] Aabiding ingii-kinjiba’aa nookomis. Gii-nichiiwad, animikiikaamagak, wawaasesemagak igaye maajii-mikwamiwang. Mii maamakaaj ji-izhiwebak niibing. Ingii-amwaa a’aw mikwam. Nookomis ingii-wiindamaag maazhipogozinid. Gaawiin idash ingii-pizindanziin ekidod. Ingii-kinjiba’iwe, ezhi-amwag a’aw mikwam. Mii dash igo nisayenh gii-saaga’ang, nisaabaawed, ji-biindigenaazhikawid