• Choose a category
• All
• Classic-Fiction

[2] Aabiding baanimaa miinawaa go gaye ingii-kinjiba’iwe, aabajitooyaan i’iw isa azheboyi-jiimaan. Nookomis ingii-piibaagimig, mawimid imaa agamiing. Gii-chiigeweyaazhagaame nookomis, ezhi-ekidod, “Madaabiin. Omaa bi-izhaan!” “Gaawiin,” ingii-ikid, ezhi-azheboyeyaan imaa Gwiiwizensiwi-zaaga’iganiing. Naaningim ingii-maji-izhiwebiz.

Gii-kikinoo’amaagoziyaan

[1] Ingii-ozhigaagoonaanig ingiw odaake-ogimaag. Mii gaa-ozhitoowaad iko mitigo-waakaa’iganan i’iw apii. Apane ko ingii-anishinaabemomin gaganoonidiyaang. Nawaj sa gii-kikendamaan anishinaabemowin i’iw apii awashiime gikendamaan noongom. Mii gaa-kagwe-gimoodimiwaad enweyaan ingiw chi-mookomaanag gii-kikinoo’amaagoziyaan. Ingii-izhinaazhikaagoo imaa, wiindamawidwaa odaake-ogimaag giiwiziyaan. Gaawiin ingii-kiiwizisii. Gaawiin nandawendanziiwag ji-maajaayaan nimishoomis, nookomis igaye. Mii dash wiin gii-animiwinigooyaan.

[2] Oon ingii-izhaamin imaa Washashkoonsing ji-gikinoo’amaagoziyaang. Mii dibishkoo go gii-ayaamagak miigaadiwini-gikinoo’amaadii-wigamig. Wayeshkad aapiji go gii-sanagad ji-ayaayaan imaa. Gii-apiitendaagwad ji-gwayako-inoseyaang bebezhig. Ingii-pakite’wigoomin giishpin wanichigeyaang. Akina anishinaabe-gaawizijig gii-kikinoo’amaagoziwag imaa, mii sa ingiw Wiinibiigoog, Ojibweg, Manoominiig igaye imaa Wazhashkoonsing. Ingii-ishwaaso-biboonagiz i’iw apii.

[3] Gii-ayaamagadoon gwiiwizensiwi-waakaa’iganan dibishkoo gabe-gikendaasowigamigong. Gwiiwizensiwi-waakaa’iganan gii-ayaamagadoon opime-ayi’ii i’iw gikinoo’amaagewigamigong, dibishkookamig ayaamagak iniw ikwezensiwi-waakaa’iganan. Ingii-danakii imaa giiwizigamigong, wiiji-ayaawagwaa gaawizijig. Ingii-gikinoo’amaagoo imaa jibwaa-apiitiziyaan ji-anokiiyaan. Gii-ayaawag ogimaakweg, ogimaag igaye.

[4] Ingii-kinjiba’iwe. Ingii-ashi-niso-biboonigiz i’iw apii ginjiba’iweyaang, niin igaye aanind ikwezensag. Nookomis, nimishoomis ingii-kanawenimigoog ishkwaa-azhegiiweyaan imaa Gwiiwizensiwi-ziibiing. Ingii-kina’amaagoog ji-azhegiiweyaan imaa Wazhashkoonsing. Mii sa go maajii-gikinoo’amaagoziyaan imaa Gwiiwizensiwi-ziibiing, gikinoo’amaagewigamigoonsing. Ingiw chimookomaani-getigejig ogii-ayaanaawaa waakaa’igaans besho Gwiiwizensiwi-ziibiing. Ogii-nanaa’itoonaawaa ji-ayaamagak gikinoo’amaagewigamig.

[5] Mii i’iw gaa-inakamigak i’iw apii gaa-gikinoo’amaagoziyaan. Ingii-poonitoomin giisphin misawendamaang. Ingii-azhe-izhiwijigaaz Wazhashkoonsing ishkwaa-boonitooyaan gikinoo’amaagoziyaan imaa Gwiiwizensiwi-ziibiing. Mii go miinawaa go gaye gii-kinjiba’iweyaan, izhaayaan imaa Misi-zaaga’iganing. Miish imaa nakweshkawag ninaabem. Ingii-wiidigendimin. Mii dash gii-nagadamaan niwaakaa’igan imaa Gwiiwizensiwi-zaaga’iganiing ji-danakiiyaan imaa Misi-zaaga’iganiing. Naaning ingii-ondaadiziike, gii-niigi’agwaa naanan abinoojiinyag. Niwani’aag niiwin; bezhig eta zhaabwiid.

Indinawemaaganag

[1] Noongom ayaamagad gaa-tazhishinikaag imaa gaa-odaminoyaan iko gii-agaashiinyaan. Ingii-mamakii’igoomin imaa, nimiseban gaye niin sa. Ingii-ayaawaa bezhig nimise, mii dash igo nitaawigid omaa Gaa-miskwaawaakokaag, gii-nitaawigi’aad odinawemaaganan Emma Bear. Gii-webinidiwag ingitiziimag. Imbaabaaban gii-nagazhiwe, naganaad nimaamaayan. Gaawiin moozhag ingii-waabamaasii imbaabaaban, aanawenimag wayaabamag. Ingii-wiindamawaa nookomis, “Gaawiin niminwenimaasii a’aw.” “Aaniin dash?” ezhi-gagwejimid nookomisiban. “Gidede gosha naa aawi.” Ingii-wiindamawaa, “Gaawiin niminwenimaasii, booch igo gaawiin.”

[2] Mii dash aapiji zhawendiyaang nookomis, nimishomis igaye niin sa. Miish igo aanind ninzhishenyag nonde-nitaawigi’iwaad. Ingii-panaaji’ig nookomis; mii go gaa-inendamowaad ninzhishenyag. Gaawiin ingii-tibendaagozisii, mii gaa-inendamowaad. Gaawiin dash ingii-misawendanziin ji-danakiiyaan gaa-ayaawaad niibowa abinoojiinyag. Ingii-minwendam ji-danakiiyaan iwidi endaad nookomis.

[3] Ingii-ayaawaag niiwin ninzhishenyag igo gaye bezhig nisayenh. Akina gii-ojaanisiwag, mii ezhi-ayaawaad niibowa abinoojinyag. Ninzhishenyag ingii-wiindamaagoog, “Eshkam igo gibanaadiz. Gidaa-ganawenjigaaz weweni. Gidaa-dibendaagoz.