Living Our Language_ Ojibwe Tales & Oral Histories - Anton Treuer [88]
[6] Endaso-giizhig akina gegoo bakaan gigii-kikendaan, mii i’iw endaso-giizhig apane gikendaasowin. Mii i’iw akeyaa bimaadiziyan. Mii gomaa ji-naazikaman ji-noondaman ji-waabandaman. Miinawaa maada’ookii a’aw manidoo. Mii i’iw akeyaa nandawaabandaman wenizhishing. Mii gaawiin wii-ani-maanaadak. Gegoo bizindawiyaang omaa zhebaa a’aw bezhig chi-aya’aa mindimooyenh gaagiigidoyaang i’iw gomaa anooj gii-ikidowaad ongow anishinaabeg wiijii’idiwaad, anooj ikidowaad o’ow gaa-injinawetaadiziwaad chi-baabaapiwaad. Noongom idash gaawiin nitaa-izhichigesii. Mii go onzaamakamig ji-niiwani’wigoowaaban o’ow awiiya bisoomak. Gaawiin dash, mii i’iw anishinaabe bemiwidood baapiwin miinawaa menwendang menwaanigozid. Miish giishpin dazhiikaman o’ow maji-ayaawish o’ow gaye zegaswaajigaadeg anooj endoodaagooyang anishinaabewiyang.
[7] Mii o’ow ge-ani-gaa’igoowing giishpin wii-kikinoo’amawaasiwangidwaa ongow gidabinoo jiinyiiminaanig weweni gikinoo’amaadiiwigamigong ji-izhaawaad ji-gabe-gikendaasowaad sa gaye wiinawaa weweni sa ji-ani-bimaadiziwaad ji-gikendamowaad sa weweni gaye obimaadiziwiniwaa weweni go ji-anokiiwaad. Gaawiin wiin, imaa ge-dazhi-inigaaziwaad.
[8] Miish o’ow akeyaa endaso-giizhig goshkoziwaanen go mikwenimagig ge-inigaazojig abinoojiinyag. Mii o’ow minikwewin wenjishkaamagak gii-inigaa’aawaad onow. Niibowa ongow ayaawag ongow mindimooyenyag, akiwenziiyag zhewendaagoziwaad sa go inenimaawaad onow odabinoojiinyiimiwaan apane gaagiigidowaad. Mii go ezhi-zhingitaagoziyaang. Aaningodinong ingiikaamigoonaanig abinoojiinyag. Indabinoojiinyiiminaanig gaawiin onisidotanziinaawaan. Bijiinag maagizhaa gaye wiinawaa da-goshkoziwag, da-aabaakawiziwag. Mii sa o’ow gaa-tibaajimang, gaa-tazhindang wa’aw mindimooyenh miinawaa akiwenzii o’ow ji-izhiwebak. Mii o’ow waa-waabandamaan noongom. Mewinzha ko gii-kaagiigidod a’aw nimishoomis a’aw gaye nookomis o’ow ge-bi-izhiwebak.
[9] Enh indanishinaabensidog! Mii noongom waabandamaan endaso-giizhig o’ow isa gaa-tazhindamowaad ongow chi-anishinaabeg. Gegoo noongom geyaabi noongom odazhindaanaawaa. Zhawendaagoziwag zhawenimigoowaad go anishinaabeg sa i’iw. Maagizhaa ogii-igoon o’ow. Enaanimiziwaad abinoojiinyag ongow gaye anishinaabensag. “Odinigayendaanaawaan. Nizhingenimigoog. Indinigayenimigoog,” mii ekidowaad. Gaawiin giishpin inigayenimigwaapinood nimishoomis i’iw a’aw, nookomis. Gaawiin da-gaagiigidosiiwag. Mii go apane enda-zhawenimaawaad wii-kagwe-giikimaawaad, ji-ani-gikendamowaad awenen o’ow isa mino-bimaadiziwin eyaamagak omaa.
[10] Mii i’iw apane ji-dazhindamaan gabe-ayi’ii. Ingii-kagwaadagii’igoo, ingii-kitimaagii’igoo iniw minikwewinish i’iw. Noongom idash ezhi-minwaanendamaan miinawaa minwaagoziyaan waabamagwaa niijanishinaabeg, indinawemaaganag chi-baabaapiyaang. Gayesh indazhimigoo apane gii-kiiwashkwebiiyaan. Ingii-inigaayenimigoog. Aaniish naa, gaawiin maanoo niin ingii-toodaaz. Gaawiin awiiya bakaan.
[11] Apegish, mii sa i’iw noongom apegish awegwen o’ow ge-bizindamogwen o’ow gaagiigidoyaan sa ongow abinoojiinyag weshki-bimaadizijig gaye gii-pizindamowaad sa go gaa-izhi-gagwaadagii’igoowaad sa o’ow endazhindamaan. Geget, geget indabinoojiinyiimidog! Onizhishin. Onizhishin o’ow bimaadiziwin. Giishpin weweni geget wii-inaazikameg wendinameg gidaa-nandawaabandaanaawaa—gego wiin onow ziiginigewigamigong, gego gaye nandawaabandameg o’ow gaye zagaswaadameg. Mii o’ow gaye gii-inaazikaagooyeg.
[12] Miish i’iw minik eta go noongom. Apegish geget bizindawiyeg bizindawegwaa sa gaye ongow chi-anishinaabeg baa-gaagiigidowaad. Maanoo ji-bizindameg gegoo imaa gigii-ondinaawaa. Apegish gagwejimagiban Gizhe-manidoo, Manidoo zhawenimineg maanoo. Miigwech.
Ishkwaakiiwan
[1] Ahaaw sa. Ninaanaagadawendam onow. Moozhag igo nimikwendaan iko gaa-pi-izhi-gagiikimiwaad ingiw a’aw nimishoomis