• Choose a category
• All
• Classic-Fiction

By Root 444 0

gaa-nitaawigi’id gaa-namadabiwaad ingiw gaagiigidowaad. Mii baanimaa mawadisidiwaad, mii sa i’iw gaa-tazhindamowaad iko niibowa waa-ani-izhiwebak gaagiigidowaad iko. Miish wiin noongom naanaagadawendamaan i’iw gaa-izhi-dazhiikwewaad gaa-izhi-gaagiigidowaad o’ow apii gii-maajii-dazhindamowaad ishkwaakiiwang. Gaawiin wiikaa o’ow noondawaasii i’iw gaa-tazhindang. Wiinawaa dash ongow gegaa go apane go owii-tazhindaanaawaa. Maagizhaa gaye wiinawaa miinawaa. Namanj iidog.

[2] Aaniish naa, nimishoomis gaa-nitaawigi’id ingii-peshwa’aa a’aw apane, namanj igo ezhaad dino wiin. Miish igo gaa-tazhindamowaad—ongow chimookomaanag akina gegoo omaa mamoowaad o’ow akii—miskwaabik, ashkikomaan, baashkizwaabik, awegodogwen igo dino akina gegoo. Gaawiin gegoo omaa odazhi-atoosiinaawaa. Miish igo akiwenziiyag, ikidowag, “Aaniin dana? Ingoding maagizhaa da-naangan o’ow aki. Mii iwidi ge-apizoyang. Hey mii sa anishinaabedog, mii iwidi ge-o-naangiziyang.” Aaniish gaa-izhi-gikendamowaad iwidi ji-izhidebining. Aanawi dazhimindwaa. Gaawiin gegoo ogii-kikendanziinaawaan. Gaye niin, mii iko gaa-wanendamaan o’ow jibwaa-ani-atenig. Namanj ikidoyaan. Gaa gegoo ogii-kikendanziinaawaa. Namanj ezhiwebak.

[3] Anooj noongom izhiwebad. Miinawaa bezhig gaa-tazhindamowaad, mii sa gii-ishkwaakiiwang a’aw bezhig akiwenzii. Anooj gegoo da-izhiwebad. Anooj gaye ongow awesiinyag gaye izhinaagoziwag. Miinawaa go anooj bakaan igo da-izhichigewag ongow awesiinyag, mii go gaye makwag, waawaashkeshiwag—anooj igo. Miish i’iw noongom maagizhaa niiyo-biboon waabamagwaa ongow bineshiinyag. Ganabaj ingii-tibaajim i’iw awasonaago gii-waabamagwaa ingiw bineshiinyag. Gaawiin wiikaa niwaabamaasiig. Wayaa akina onizhishiwag, mii ganawaabaminaagoziwaad.

[4] Miinawaa a’aw nigig. Gaawiin wiikaa niwaabamaasii ji-gwaashkwanid a’aw. Mii eta go niizhing waabamag gwaashkwanid. Mii eta go bimoodedood dibishkoo o’ow. Mii anooj. Miish i’iw mekwendamaan iko i’iw. Mii ganabaj igo beshowang.

[5] Miish azhigwa ekidowaad, “Haa noozis. Ozhiitaan. Ozhiitaan weweni. Ozhiitaan. Gaawiin gigikendanziin apii ge-maajaayan.” Gaawiin ingii-nisidotawaasiin. “Maajaayan,” ingii-inendam iko. “Giwii-ikonaazhikaw. Niwii-saagidinaash. Ogimaa wiijaan.” Mii gaa-inendamaan. “Gaawiin gonaa. Omaa ozhiitaan. Mii dawaaj ji-gaganoonad a’aw manidoo. Mii go gaye wii-pizindanziwan, gaawiin giga-izhibaadizisii.” Ingii-tebinig a’aw nimishoomis.

[6] Ingii-izhinaajitoon i’iw nimbimaadiziwin. Mii o’ow minikwewinish. Noongom eyaag niibowa ezhinaajiigwang miinawaa go zagaswaajigaadeng. Mii gaye gaa-tazhindamowaad. Aandiish gaa-ondinamowaad i’iw gaa-kikendamowaad o’ow akina? Miish noongom waabandamaan i’iw.

[7] Inzegiz iko aaningodinong aaniish ge-izhichigeyaan inandomag a’aw manidoo. Mii gaye omaa bi-dagoshinaan niwaabamaa maajaayaan biindaakoojigeyaan gii-miizhid i’iw naanaagadawendamowin. “Weweni giga-ganoonig a’aw giijanishinaabe.” Mii go gaye ji-gikinootawid igo ji-wiidookawag a’aw. Wii-nibwaakaa a’aw wiin gii-kwayakosidamawid i’iw wanigiizhweyaan gegoo i’iw da-biimendang.

[8] Miish i’iw. Ate go noongom o’ow. Ogikendaanaawaadog anooj o’ow akiing. Ganabaj gii-pimisemagad, amanj igo. Inashke iwidi zhaawanong zoogipog. Gisinaamagad. Gaawiin wiikaa gii-izhiwebasinoon. Mii eta omaa gaa-tazhi-gisinaamagak. Miish noongom o’ow. Gemaa gichi-aabawaa go inashke go biboong. Ishkwaa-aabawaag, gaawiin aapiji gisinaasinoon. Mii iwidi gii-kisinaag i’iw zhaawanong. Mii iw.

[9] Namanj igo debwewaad ongow akiwenziiyag. Indinendam. Mii go ombibizowaad igo chimookomaanag igo gii-kagwe-gikendamowaad i’iw aaniindi. Giishpin a’aw manidoo gii-nandawenimaad onow bemaadizinijin gichi-aya’aan, odaa-gii-asaan iwidi, iwidi gii-tibendaagoziwaad. Gego babaamenimaakegon. Inashke dash o’ow maajiibideg i’iw. Obiindwekaminaan enigok baashkised o’ow ombibizod a’aw. Miish i’iw mashkawiziimagak o’ow babaamendamaan iko mikwendamaan akina o’ow gaa-mamigaadeg akiing. Mii i’iw naanganigwak. Miish wenji-onabiseg o’ow. Miish i’iw gii-noondawagwaa ko ingiw gichi-anishinaabeg dibaajimowaad. Inashke go awedi wayaabishkindibed noongom gaye wiin; mii go gaa-izhi-noondawag