• Choose a category
• All
• Classic-Fiction

[5] Booch igo ingoding igo ingii-mooshkinebanaanaan a’aw akik. Gaye ingii-aawadoon. Ingii-tazhitaamin igo dazhitaayaang dazhiikamaang i’iw nibi. Ganabaj onzaam imaa akeyaa iko i’iw awiiya ge-biziigwebakiteshing i’iw nibi, aya’aa ogii-mooshkinebanaan aawanaad dash iko nimaamaayiban i’iw booch igo gii-mooshkinebanangid a’aw akik. Inashke wiin, mii go o’ow apii, ingii-odaminomin igo, dibishkoo i’iw apii noongom wiin anoonigooyaan iko gichi-anokiiwin, gichi-anokiiwinagak i’iw aawadoong, nibinaading sa go gegoo wii-mooshkinebanind a’aw akik.

[6] Mii imaa aabiding mamikwendamaan i’iw iwidi Gibaakwa’iganing gii-taayaang jiigibiig i’iw Nenaandago-ziibi ezhinikaadeg. Mii i’iw minik imaa ezhi-ani-mikwendamaan ji-inaajimong i’iw. Noongom wiin ganabaj gaawiin awiiya geyaabi ogikendanziin ezhinikaadenig i’iw ziibi, anishinaabewinikaadenig. Niin iko indaa-ani-gagwedwe iko iwidi izhaayaan. Gaawiin awiiya geyaabi ogikendanziin. Mii eta go ezhi-gikendamowaad Tamarack River. Mii wanising iniw anishinaabe-izhinikaazowinan. Wanisinoon anooj gaa-izhinikaadegin iniw gaye odenawan iwidi. Noongom wanisinoon gii-anishinaabewinikaadeg iko mewinzha.

Ikwabin

[1] Anooj igo gegoo ayi’ii nitaawadoon iniw ojibwemong, inashke a’aw iwidi wayeshkad gii-tibaajimoyaan—giboodiyegwaazon ezhinikaazod. Mii i’iw, mii i’iw anooj eni-ikidong. Inashke awiiya namadabid ingoji nandawenimind ingoji bakaan ji-o-namadabid, gegoo izhi-wiindamawind ingoji bakaan ji-o-namadabid, ji-namadabisig imaa geyaabi, gaye noongom awiiya ikidod i’iw, “indaga ikwabin.” Mii i’iw enind a’aw awiiya ingoji bakaan ji-o-namadabid, ikwabing.

[2] Gayesh wiin a’aw, mii ko mewinzha anishinaabeg gii-odikwamiwaad. Mii i’iw head lice, body lice. Mii iniw ikwan gaa-izhinikaanaawaajin. Gayesh awiiya ikidong i’iw “ikwabin,” ingod dibishkoo inind awiiya ji-inabid amanj enabigwen a’aw ikwa. It’s easier to explain that in English because it sounds, when you say “ikwabin,” it means “sit like a louse.” Mii i’iw anooj initaagwak iniw anishinaabe-ojibwemowinang.

Gidinwewininaan

[1] Ganabaj igo mii geget wanising o’ow ojibwemowin. Gegoo imaa iwidi bezhig gaa-ozhitooyaan naabisijigan. Noomaya gomaa ingii-kiizhiikaan gaa-tibaajimoyaan o’ow ezhi-wanitood a’aw anishinaabe gaa-ina’oonind ji-inwed da-ojibwemoyang. Geget wanitoowaad; inashke igo gaa-inaadodamaan iwidi wanitoowaad ezhinikaadenig anooj odenawan, ziibiwan, miikanan, anooj igo gegoo ingiw wanitoowaad. Gaawiin awiiya geyaabi ogikendanziin. Gaawiin ogikendanziinaawaa iniw zaaga’iganiin ezhinikaadeg, ojibwewinikaadeg. Mii noongom eta go zhaaganaashiiwinikaadamowaad ezhi-gikendamowaad noongom abinoojiinyag. Ganabaj awiiya gaganoonaad onow abinoojiinyan, maagizhaa odaa-wiikwajitoonaawaa.

[2] Inashke go noongom onow niizhing akeyaa enwejig, wejibwemojig miinawaa go zhaaganaashiimowaad ingoji nagishkodaadiwaad. Niin wiin igo, ingoji nagishkawag, giishpin gikenimag ji-ojibwemod, mii go ojibwemotawag. Inashke, mii go imaa minik gayaagiigidoyaan ge-izhi-ojibwemotaadiyaang. Maagizhaa go miinawaa a’aw naasaab a’aw ingoji waabamag maajii-zhaaganaashiimotaadiyaang, mii go minik ge-mawadisidiyaang ge-zhaagaanaashiimoyaangiban. A’aw nitam gaagidod maajii-ojibwemod, mii go gaye ge-izhi-ojibwemongiban ji-wii-kashkitood. Gaye wiin aapiji ojibwemosig a’aw ge-ganoonind, mii i’iw. Gaawiin aabadasinoon. Wenipanad. Owenipanendaanaawaa noongom abinoojiinyag o’ow zhaaganaashiimowaad.

[3] Inashke go iwidi gaa-ako-gichi-miigaadiing gaye niin gaa-izhaayaan o-dagoshinaan; azhegiiweyaan eshkwaa-miigaadiing i’iw gii-noondawagwaa ingiw abinoojiinyag gaawiin aapiji ojibwemosiiwag. Miish iniw igo niijaya’aag, ingiw indedeyiban oniijaanisan. Ingii-wani’aanaan niinawind nimaamaa. Gayesh wiinawaa, gii-wiidiged a’aw indedeyiban, mii abinoojiinyan wiinawaa gii-ayaawaad. Mii ingiw gaa-izhi-wiikwaji’angidwaa ji-ojibwemowaad. Gayesh igo noongom mii go akina izhi-ojibwemowaad ongow, ongow nishiimeyag, mii ingiw. Niinawind ingii-ojibwemotawaanaanig. Gaye wiin a’aw bezhig gaa-omisenyiyaan waadiged gaye wiin, iniw oniijaanisan