Living Our Language_ Ojibwe Tales & Oral Histories - Anton Treuer [27]
[4] Aanawi wii-wiikwaji’agwaa gii-kikinoo’amawagwaa bemaadizijig ji-ojibwemowaad, mii i’iw apane gaa-inagwaa i’iw. “Giishpin awiiya wanigiizhwed, gego baapi’aakegon,” ingii-inaag. Ingii-inaag miinawaa, “Gii-kikinoo’amaagoziyeg awiiya bi-wiijiiwig apane gaye ge-waabameg. Mii imaa akeyaa ge-izhi-gaganoonidiyeg,” ingii-inaag idash.
[5] Gaye wiin noongom abezhig bezhigod, gaawiin owiikwajitoosiin wii-aabajitood i’iw, ji-ojibwemod. Ojibwemotawind igo awiiya, mii gomaa apii ge-izhi-nisidotang. Miinawaa go, mii gomaa apii ge-izhi-wiikwajitood ji-ojibwemod.
[6] Inashke iniw gaa-omaamaayikaayaan oozhishenyan ogii-ayaawaan. Gaye, gaawiin ingiw gii-pi-nitaawigiwaad ingiw ojibwemosiiwag. Miish a’aw nimaamaayikaan imaa, niiyawe’enh, a’aw nindedeyiban gaa-wiidigemaajin, ogii-pami’aan aanind iniw. Apane gii-pamoozhe, mii go apane. Gaawiin gii-nitaa-zhaaganaashiimosiin. Mii i’iw apane gii-ojibwemotawaad iniw abinoojiinyan. Inashke, mii i’iw gomaa apii ingoji ingiw abinoojiinyag gaa-izhi-zhaaganaashiimowaad. Noongom dash igo ojibwemowag gaganoonindwaa. Ojibwemotawindwaa ongow ji-ojibwemowaad. Zhaaganaashiimotawindwaa, zhaagaanaashiimowag. Mii go niizhing akeyaa izhi-inwewaad gaagiigidowaad. Daa-gaagiigidowag ongow abinoojiinyag. Niizhiwag ganabaj netaa-gaagiigidojig.
[7] Wiikwaji’ind igo gaganoonind a’aw awiiya, mii i’iw akeyaa ge-izhi-gashkitood ji-ojibwemod, nitam ji-nisidotang. Miish miinawaa ge-izhi-wiikwajitood giishpin awiiya ayaasinig ge-baapi’igod ingiw wanigiizhwed. Gaawiin onjida odoodanziin i’iw—wanigiizhwed gegoo gikinoo’amawind. Noongom niin awiiya noondawag gegoo wani-ikidod, mii gomaa apii ezhi-wiindamawag imaa gii-ikidod.
[8] Inashke noongom ingiw nishiimeyag, mii go gaye wiinawaa ezhi-nitaa-ojibwemowaad ingiw. Gaye wiinawaa gegoo ani-wawanendamowaad, geyaabi ingagwejimigoog. Miinawaa ingagwejimigoog mii onow akeyaa ekidong, ikidoyaan. Mii ezhi-wiindamawagwaa akeyaa wii-ikidowaad. Mii ganabaj akeyaa gii-izhi-gikendang a’aw bemaadizid ji-ojibwemod.
[9] Indayaa owidi ayaapii ishkoniganing gabe-niibin noongom endaayaan. Mii go omaa, ingii-ani-onji-maajaa. Gichi-odenaang ayaawag ingiw omaa anishinaabeg. Mii wiin omaa, owiikwajitoonaawaa. Owiikwajitoonaawaa nawaj niibowa omaa wii-ojibwemowaad. Iwidi wiin ishkoniganing eyaajig gaawiin aapiji owiikwajitoosiinaawaa. Mii eta go gii-shaaganaashiimowaad, wiinawaa iwidi bezhig wiikwajitoowaad. Namanj iidog gemaa gaye agadendamowaagwen anishinaabewiwaad. Mii akeyaa ge-izhi-wanitood a’aw anishinaabe odinwewin, agadendang i’iw anishinaabewid.
Mawadishiwewin
[1] Mewinzha ko gaa-izhichigewaad gii-mawadisidiwaad gichi-anishinaabeg gii-paa-nanibendaadiwaad. Mii go gaye awiiya wii-maajaad. Mii go mawadishiwed ingoji gemaa gaye waaboowayaan ogii-maajiidoon. Aanawi go ogikendaan ingoji ji-nibe’ind. Mii dash igo gaa-izhi-biidood i’iw konaas igaye ji-agwazhed. Gaawiish memwech inime’odisaajin memwech akina gegoo odaa-ondinamaagosiin o’ow wiin gaa-izhi-bimoondang gaye wii-agwazhed miinawaa go iniw apikweshimod igaye. Mii eta go gii-waabanda’ind aandi ji-nibaad miinawaa a’aw gegoo gii-miinind ji-apishimod. Mii imaa wiinawaa gii-mawidisidiwaad. Akina gegoo ogii-tazhindaanaawaa.
[2] Inashke giinawind noongom mawadisidiyaang, gegoo maagizhaa ingo-diba’igan, niizho-diba’igan mawadisang awiiya. Mii go i’iw. Gemaa go gaye gaa ingii-kaganoonaasiiwaanaan. Mii i’iw mazinaatesijiganimakak genawaabandamaang. Mewinzha ko wiinawaa gii-tadibaajimotaadiwag akina gegoo ezhiwebadinig. Gayesh wiin noongom gaawiin geyaabi gidizhichigesiimin. Inashke go owidi noongom gabe-niibin o’ow ayaayaan, mii imaa ayaad a’aw besho igo a’aw niitaa. Miish naa gayesh, iwidi go ingii-o-naanaa indawemaagan. Miish imaa nazhikewid jiigi-ayaawid niitaa. Giishpin ezhaayaan