• Choose a category
• All
• Classic-Fiction

By Root 380 0

miinawaa ge-izhi’igooyaan. Gaawiin gegoo gaa-noondamaan o’ow isa, miinawaa megwaa bimosed a’aw gichi-ayaabe gaa-noogishkaad besho go. Gaawiin igo waasa, besho imaa niibawi apane. Gaa-inaabamag, wayaa wenda-onizhishi. Indaa-waateshkaagoo dibishkoo o’ow isa apane ba-inaabamid, inaabamid iwidi, inaabamid akeyaa apane gaa-inaabamid. Miish igo omaa eteg baashkizigan. Gaawiin gaye nimamoosiin, apane gaa-inaabamag. Wa, chi-weweni bimosed besho; chi-weweni apane gaa-ako-waabishkikiing apane. Naa sa naa gii-izhiwebiziyaan, indinendam isa ogoopimaanaawaan ingiw chimookomaanag waa-pagidinishkawaawaad. Wa, bi-dagoshing a’aw chimookomaan indizhi’aa imaa gaa-pi-izhaad a’aw.

[26] Besho imaa ingaganoonig ojibwemong. “Besho omaa, besho omaa izaabamaad awedin waawaashkeshiwan,” indig. “Enh,” indinaa. Miinawaa indoojibwemotawaa. “Geget,” indinaa. “Geget besho omaa ninandawaabamaa. Ninandawaabamaa weweni ji-gii-nisagiban,” indinaa. “Apane gaa-inaabamag,” indinaa. “Wenda onizhishi a’aw waawaashkeshi. Gaawiin gaye aagawaateshkaasiin,” indinaa. “Weweni bimose jekaakwa’ang.” Gaa-izhi-gagwejimag a’aw, indinaa gaa-izhi-gagwejimag a’aw ji-ganawaabamag miinawaa bangii bimaadiziyaan. Mii gaa-izhi-gagwejimag, “Aaniin ezhiwebiziyaan,” indinaa. “Enh,” ikido. “Gaawiin. Gaawiin inendaagwasinoon ji-nisad onow,” ingii-ig. “Gego miinawaa wiikaa nisaaken onow,” ingii-ig. “Gizhawenimaa a’aw awesiinh,” gii-ikido. “Gizhawenimigoog giin igo. Manidoog i’iw oga-zhawenimaawaan giniijaanisan,” gii-ikido. “Gego miinawaa wiikaa omaa nisaaken eta noo onjida,” ingii-ig. “Giga-naganigoz. O’ow manidoog giga-naganigoog onjida nisadwaa,” gaa-ikidod. “Aan naa manidoog ingiw, mii ingiw awesiinyag ezhinikaazojig, waawaashkeshiwag. Gegoo ezhiwebak biindaakoojigeyan igo gaye, mii ezhi-gikendaagwak gegoo ji-izhichigesiwan.”

Wenji-ganawendamang Gidakiiminaan

[27] Mii gaye akiwenzii gaa-wiindamawid: “Mii ingoding, mii ezhi-gikendaman igo gegoo, maagizhaa gaye ji-giiwaadiseyan,” gii-ikido a’aw akiwenzii. Mii sa gaye, mii sa apane wii-inendamaan i’iw gegoo. Gegoo niwii-izhaanendaan sa go gegoo. Wii-wanichigeyaan ji-wanigiizhweyaan gaye ayaapii, gaawiin igo ingotaayisiin, eta go bangii niizhaan eta, gaawiish gegoo. Gegoo gaa-izhid a’aw akiwenzii. “Gego, gego gaye. Gaawiin gaye gidaa-giiwanimosiin gegoo,” ikido. Ingii-wiindamaagoz i’iw gaagiigidod i’iw, “Gego agajiken gaye da-gaagiigidoyan.” Mii gaa-izhid a’aw akiwenzii. Moozhag go ingii-paa-wiindamaagoog ingiw akiwenziiyag i’iw. “Gego babaamendangen gegoo ji-wanigiizhweyan gaye,” gii-ikido.

[28] Gegoo ingoding, ingoding igo gaye gaa-ani-bimiwinagwaa dewe’iganag, ingii-igoog ingiw akiwenziiyag. Gayesh igo geget, gayesh bimiwinagwaa ingiw dewe’iganag, wiidookaazoyaan ji-bimiwinag wa’aw dewe’igan. “Onjida go noondaagozi ji-bimiwinaad ji-gikendang iniw dewe’iganan.” “Da-zhawinendaagoziyan sa go, giiyaw da-zhawendaagwad. Miinawaa giniijaanisag, goozhishenyag, gidaanikobijiganag, gegoo akina giijikiwenyag, miinawaa go gidinawemaaganag sa go akina—mii akina ingiw ge-zhawendaagozijig gagwejimadwaa ongow manidoog miziwe eyaajig genawendangig o’ow aki. Mii sa gaye, gaawiin giinawind gidibendanziimin o’ow aki. Gaawiin sa go gidaa-dibendanziin. Giganawendaamin eta go. Gayesh wiinawaa chimookomaanag, ‘Hey indibendaan o’ow aki.’ Hey, gaawiin gidibendanziinaawaa. Maagizhaa gaye, maagizhaa gaye niisininig da-dibendamowaad. Gaawiish odaa-dibendanziin. Gaa odaa-ikidosiin owidi da-dibendang. Anishaa gidabiitaan mino-aki. Gizhe-manidoo gigii-izhi-igoonaan ji-ganawendamang o’ow, ji-ganawendamang o’ow aki ji-ganawenimangwaa ongow, weweni ji-ganawaabamangwaa ongow awesiinyag, miinawaa ingiw binesiwag, miinawaa giigoonyag, miinawaa zaaga’igan, mitigoog, akina sa ingiw.” Mii gaa-izhid a’aw ani-igooyang ji-ganawendamang.

[29] Gayesh noongom ingoji go naabe izhind akina ingoji ji-asinajigaadeg o’ow aki. Gegoo omaa zaaga’igan ingoding igo, ingoji go ingii-ashi-naanobiboonagiz gemaa ingii-ashi-niiyo-biboonagiz go, gii-paa-kikinoo’amaageyaan i’iw giigoonyag gii-pi-miinagwaa sa chimookomaanag ingiw wii-tiba’amawiwaad gaye ji-gikinoo’amawagwaa iniw giigoonyan