• Choose a category
• All
• Classic-Fiction

By Root 436 0

i’iw omaa niimi’idiing gegoo go ezhi-mikwendamaan igo ezhi-gikinoo’amawagwaa ongow oshki-ininiwag weshki-bimaadizijig i’iw bizindawiwaad ingiw nesidotawijig. Miish ingoding, oga-ani-aabajitoonaawaan gaye wiinawaa ji-ani-gikendaasowaad ingiw o’ow ezhi-dazhimindwaa ingiw manidoog ge-ani-apiichi-nookwikamig i’iw manidoo, manidoo bezhig o’ow isa. Niibowa waa-ayaawaad manidoog gegoo akina gegoo omaa o-ganawendweninangwaa ji-ganaweniminangwaa sa go gaye ingiw manidoog. Aaningodinong iko, aaningodinong iko niwenda-niizaanendam ko gaagiigidoyaan i’iw aaniin i’iw wenji-ininendaagoziyaan i’iw. Miish igo naa mikwendamaan, ingii-pi-wiindamaagoo ji-maada’ookiiyaan. Mii wenji-gikenimid a’aw, mii sa go ji-wiidookawag inenimid a’aw manidoo endazhimag. Moozhag go, moozhag go ingagwejimigoog ingiw anooj igo awiiya go i’iw, “Aaniish gaa-onji-gikendaman gaye giin o’ow?” Onjida, onjida ongow go wiidookawagwaa, indinenimigoog manidoog o’ow gii-pi-waawiindamawiwaad ingiw akiwenziibaneg mewinzha. Gegoo niibowa go ingii-pi-wanendaan a’aw akiwenzii gii-paa-wiindamawid azhigwa. Miinawaa azhigwa nichi-aya’aaw. Nichi-aya’aaw gikendaasoyaan ezhinikaadeg gegoo. Mii azhigwa ani-gikendamaan i’iw ge-izhi-minosed a’aw niijanishinaabe azhigwa ge-izhi-gikendaasod igo awiiya.

[40] Mii gegoo, gegoo giin ge-izhi-waawiindamoonaan go gaye, gegoo go wiindamoonaan iwidi niimi’idiing ko. Mii ezhi-minwendamaan igo gegwejimid awiiya anishinaabe moozag igo gagwejimid ezhi-gikendaasoyaan. Mii gaye niin ji-ani-gikendaasoyaan, nawaj gikendaasod a’aw bezhig. Miinawaa go ongow aanind ongow weshki-bimaadizijig gegoo azhigwa midaaswi-ashi-ningodwaaso-biboonagiziwag azhigwa gaye—gaawiin geyaabi indaa-izhi-agindanziin—maagizhaa gaye midaaso-biboon, niishtana, namanj iidog. Miish i’iw wenji-wiidookawag niijanishinaabe weshki-bimaadizid nesidootawid. Mii ji-ani-gikendaasod gaye. Ingoding go naanimidana ashi ingodwaaso-biboonagiziyaan, “Mii giin gikendaman o’ow ji-mikwendaman o’ow gidizhitwaawininaan sa go gaye ge-izhi-minoseyang sa go miinawaa go ge-izhi-minosewaad giniijaanisinaanig, goozhishenyinaanig, giiji-ayaawaad, booch eyaawaad goozhishenyinaanig. Ingoding gaye, mii moozhag zhawendaagwak goozhishenyag ayaawaad imaa nawaj igo gidaanikobijigaansag ayaawaad sa go ongow.”

[41] Sa go ongow indaanikobijigaansag naaniwag azhigwa, bezhig gwiiwizens miinawaa niiwin ikwezensag. Wayaa! Mii apiichi-apiitenimagwaa. Mii gaawiin ge-inendaagoziwaanen ji-daanikobijigeyaan. Niibowa wiin gaye noozhishenyag ayaawag. Zhaangaswi ayaawag ingiw noozhishenyag. Miinawaa naaniwag, ganabaj igo nising endaayaan. Indaa-bimaadiz ji-daanikobijigeyaan. Maagizhaa gaye namanj ingikendaan. Gaawiin sa go ingikendanziin minik weni-bimaadizid. Mii go Gizhe-manidoo o’ow gii-pagaminang o’ow apii waa-ani-ishkwaa-ayaayang sa go.

[42] Gegoo mewinzha ko, mewinzha ko gaye ingii-kagiibaadiz iko mewinzha. Ingii-minikweshk gaye gegoo. Gegoo aangodinong iko wii-minikweyaan, mii i’iw gaa-izhi-wanibiiyaan iko gaye. Ingii-kiiwashkwebii sa go. Gaawiin ingikendanziin gegoo dagoshinaan endaayaan gigizhebaawagak babaa-niibawiyaan, “Aaniish gaa-izhi-dagoshinaan omaa?” Awiiya ingii-kanawenimig. Inganawendaagoz. Gegoo ingii-kanawendaagoz. Miish dash waa-kikendamaan gaa-onji-ganawinendaagoziyaan. Mii i’iw wii-ani-wiidookawag a’aw niijanishinaabe, wii-pimiwinagwaa dewe’iganag wiidookaazoyaan. Mii gaa-onji-ganawinendaagoziyaan sa go gegoo. Dibishkoo go ongow nimanidoomag inganawenimigoog. Enang, “Dibi go ezhaayan booch igo giganawenimig gegoo, gegoo o’ow inaabiyan,” indig. “Akeyaa opime-ayi’ii gaye gegoo biijibideg, awenesh dabaziyan awiiya. Giwii-nibaa gegoo wii-piizikaagooyan gaye. Gaye giganawendaagoz. Ingiw gimanidoomag giganawenimigoog o’ow wenji-gikendaasoyan, wenji-gikendaman sa go gegoo.” Mii i’iw gaye gaa-pi-izhiwaad ingiw akiwenziiyag. “Gegoo, gegoo go gidoonji-ganawendaagoz,” ingoding ingii-ig. “Gegoo ji-ani-wiidookawad giijanishinaabe,” ingii-igoog ingiw akiwenziiyag.

[43] Gayesh igo geget, mii go ezhi-waawiidookawag geshkitooyaan gashkawewiziyaan ji-wiidookawag a’aw niijanishinaabe. Mii go ezhi-miigwechiwi’ag izhi-inendamaan