• Choose a category
• All
• Classic-Fiction

By Root 403 0

a’aw bi-gagwejimid gegoo awiiya ji-waawiindamawag. Miish i’iw gegoo omaa, gegoo omaa waawiindamoonaan o’ow eko-minwendamaan i’iw ji-gikendaasod a’aw niijanishinaabe ji-wii-ani-bizindawid. Gaye ingoding maagizhaa gaye ingoding o’ow gaawiin imaa inga-ayaasiin ingoding ji-gikendaagwak i’iw wenji-wiidookawag anishinaabe. Moozhag iko, moozhag iko o’ow nimishoomisiban, ambesh go dino indayaamaambaan, indinendam akina go gegoo gaa-pi-waawiindamawid. Mii nawaj gikendaasoyaan, gaawiin dash memwech i’iw, memwech i’iw. Ingoding go, ingoding go ezhi-mikwendamaan iko gaa-pi-izhid gii-pi-gogiiyaan aangodinong go. Ingoding go ingii-midaaso-biboonagiz i’iw. Ingii-ashi-niizho-biboonagiz gii-pi-waawiindamawid a’aw akiwenzii, akiwenziiyag sa go, miinawaa go mindimooyeyag. Mii go gaye wiinawaa ingiw mindimooyeyag gaa-izhi-wiindamawiwaad iko i’iw. Mii go gaye gaa-pi-izhiwebak, ge-ani-izhiwebak sa go gii-kikendaasowag sa go ingiw akiwenziibaneg miinawaa mindimooyebaneg. Wii-manidoowaadiziwag sa go ingiw akiwenziibaneg, gaawiin miinawaa go o’ow, gaawiin go akina ongow. Moozhag go, moozhag go nimikwenimaag ongow. Ingichi-miigwechiwi’aag go ingiw akiwenziiyag gaa-wiindamawiwaad. Mii gaye niin wenji-waawiindamaageyaan i’iw gaa-pi-waawiindamawiwaad. Mii gaa-onji-izhichigewaad i’iw ji-waawiindamaageyaan gaye niin igo owidi go biinish waasa dibinendaagoziyaan a’aw dewe’igan miinawaa go akina sa go gegoo, gegoo akina go ji-wiidookawag inendaagozid, ji-wiidookawag a’aw niijanishinaabe. Mii gaa-onji-asigooyaan gaye niin iidog omaa. Inde-inendam sa go gegoo gaye giin. Mii go gaye giin gaa-onji-asigooyan ji-ani-waawiidookawad ji-aaniikanootawad a’aw bwaaniwitood ji-ojibwemowaad.

Inwewin Meshkawiziimagak

[44] Mii eta go zhaaganaashiimowaad, eta go aanind igo gaye, maagizhaa gaye ingoding go besho. Mewinzha ko gaawiin igaye awiiya omaa, gaawiin gaye awiiya omaa gii-shaaganaashiimosiin gaye, mii eta go. Mii gaye gii-pi-agaashiinyiyaan igo eko-giiyaan igo iidog gaye niin gii-anishinaabe-ganoozhiyaang ingitiziimag miinawaa go akiwenziiyag. Gaawiin wiikaa gii-shaaganaashiimosiiwag ongow akiwenziiyag. Gaawiin sa ogii-kikendanziinaawaa ji-chimookomaani-gaagiigidowaad.

[45] Gegoo giga-wiindamoon i’iw. Ingii-ingodwaaso-biboonagiz omaa gii-maajiitaayaan ji-gikinoo’amaagooyaan. Gaawiin gaye, gaawiin gaye ingii-kikendanziin i’iw chimookomaan gaa-izhid. Gaawiin gegoo ingii-kikendanziin. Mii gaa-izhi-bwaanawiziyaan awenesh ge-izhid a’aw indinendam. Miish a’aw isa niitaawis gaa-wiijigimag o’ow dibishkoo. Mii a’aw gaa-aaniikanootawid waawiindamawid. Jiigegaabaw gii-izhinikaazo. Mii gaa-wiindamawid i’iw gaye ikidowin indig. Aanish go ingii-kopaji’ig a’aw gwiiwizens, niijakiwenzii dibishkoo go. Mii gaa-izhi-izhid ko ji-wiindamawag i’iw gikinoo’amaagewinini. Ingii-wiinigiizhwe gomaa omaa gaye ji-bazanjiiwid ko a’aw gikinoo’amaagewinini. Miish a’aw bezhig igo miinawaa bezhig niitaawis gaa-pi-izhi-wiindamawid, “Gego bizindawaaken Jiigegaabaw. Niin omaa bizindawishin gaye.” Mii a’aw weweni. “Gaawiin miinawaa inga-bizindawaasiin wiikaa.” Wewiib igo ingii-kikendaan igo i’iw wiinigizhweyaan akina gaa-izhi-ikidoyaan gaye. “Eko-bi-wiijiiyan,” ingii-ig gaye; mii a’aw Jiigegaabaw gii-izhinikaazod. “Miinawaa go gibi-wiijii’in,” indig. “Enh,” indinaa gaye wiin igo, ongow oshki-ininiwag gaye miinawaa ingiw. Gaawiin gaye, aanish sa gaawiin gaye owii-kikendanziinaawaa ji-anishinaabe-gaagiigidowaad. Gaawiin ogii-kikendanziinaawaa. Miish i’iw gaa-izhid. “Gegoo aanawewiziyan,” indigoo. Gii-tagwaagig gii-maajii-gikinoo’amaagooyaan, azhigwa ani-ziigwang, mii azhigwa ani-izhi-gikendamaan i’iw chimookomaani-gaagiigidoyaan. “Anishinaa go awenesh ge-bonezid,” indinaag gwiiwizensag. “Niizh ingikendaanan. Inga-ayetoonan,” indinaag gaye. Bizaaniyaawag. “Gaawiin imbaapi’igoosiin geyaabi. Gaawiin geyaabi imbagosenimigoosiin,” ingii-inaag, baa-baapi’agwaa ingiw sa go weweni, weweni gii-kashkitooyaan ji-gaganoonagwaa ingiw chimookomaanag dash.

[46] Gaawiin wiikaa, wiikaa dibi go baa-anokiiyaan—anooj igo ingii-paa-anokii waasa iwidi akeyaa daga biizh ingiw chimookomaanag gaa-wiidanokiimagak—gaa wiikaa