• Choose a category
• All
• Classic-Fiction

By Root 491 0

gaye ingii-wanendanziin i’iw anishinaabe-gaagiigidowin. Gegoo azhigwa ginwenzh ingii-anokii iwidi Gakaabikaang. Ganabaj igo nisimidana daso-biboon o’ow gaye ingii-anokii. Anooj igo wii-tanakiiwagwaa ingiw chimookomaanag, gaawiin wiikaa niwanendanziin i’iw indizhitwaawin. Gegoo aaningodinong igo abinoojiinyag, mii gegoo noongom igo ongow abinoojiinyag, mii dash gaawiin ogikendanziinaawaa i’iw anishinaabe-izhitwaawin. Ingikendaan igo. Gaawiin niibowa, niibowa o’ow gaye gichi-aya’aag, gaawiin ogikendanziinaawaa i’iw anishinaabe-izhitwaawin. Miinawaa ji-gaagiigidoyaan, mii eko-maanendamaan i’iw bwaaniwitood anishinaabe ji-anishinaabe-gaagiigidod iwidi gaa-ina’ooninijin ji-gaagiigidod. Moozhag ko inendamaan maanendamaan ingiw waabamagwaa niniijaanisag gegoo niniijaanisag, gaawiin ninisidootaagosiin aano-gaganoonagwaa. Aanish igo gaye ganabaj igo gaye niin igo, gaawiin niin ganabaj igo indizhichigesiin gegoo gii-pi-agaashiinyiwaad weweni go bi-gaganoonagwaaban. Maagizhaa gaye wiinawaa, mii ge-izhi-gikendamowaaban azhigwa go o’ow apii. Gaawiish. Ingii-pi-aagonwetaan meta gii-ojibwemotawagwaa, chimookomaani-gaagiigidoyaan gii-agaashiinyiwaad gii-pi-gogiiwaad. Miinawaa gii-pizhishigwaa anishinaabeg bi-gaganoonagwaaban gaa-pi-doodawiwaad ingiw akiwenziiyag miinawaa go ongow ingitiziimag. Booch igo weweni, weweni gaa-kaganoonagwaaban ingiw niniijaanisag, indaanisag, nisidootamowaad, maagizhaa gaye odaa-gikendaanaawaa i’iw anishinaabe gaa-izhi-miinind. Moozhag go, moozhag go niwenda-maanendam niniijaanisag gikendanzigwaa i’iw. Gegoo gaye booch igo gayesh ogikendaanaawaa-sh igo wii-piindaakoojigewaad gegoo wii-izhiwebak i’iw ge-animikiikaag gaye gegoo go asemaan asaawaad. Ogikendaanaawaa ongow eniwek i’iw gagwejimaawaad ingiw iwidi. Ingii-waabamaabaneg ingiw iwidi gii-taayaang. Ongow ogikendaanaawaa ge-izhi-baayaashing gii-izhinikaadeg ge-izhi-baayaashing ge-chi-nichiig wii-chigewaad ingiw manidoog.

[47] Ingoding owidi akeyaa iwidi bangishimog iwidi akeyaa ingii-waabandaanan, mii iniw bi-naagwak akeyaa biindaakoojigeyaan, a’aw mii dash ingozis imaa gaa-wiijii-ayaad. “Hey. Ishpiming gaye inaabin,” ikido chimookomaani-gaganoonid. “Gayesh naa ongow, gayesh naa wa’aw migizi,” ikido. Gii-izhibaabasod a’aw sa omaa bi-waabamag. Miinawaa ishpiming gaa-ani-izhi-izhaad ishkwaa-bi-waabamangid a’aw migizi. Mii iwidi akina gaa-ninikawag i’iw gii-ani-maajiidood a’aw migizi. Gaawiin imaa gii-pangishinzinoon omaa, omaa anishinaabe-aki akeyaa. Ingii-nakomigoo. Ingii-nakomewiz miinawaa gii-piindaakoojigeyaan sa dash agaamed. Chimookomaanag endaawaad, mii gii-ani-boonimaag gii-ani-bigishkaasijigewaad iwidi manidoog iwidi agaamayi’ii miinawaa zaaga’iganiing. Ingii-pizindaamin igo debaajimomaawag gii-ani-bangising. Gaye gaawiin omaa gii-pagisinoon. Inashke, gaa-izhi-gagwejimag a’aw bezhig Naawigiizisookwe miinawaa bezhig a’aw Zhaawanaasang gaa-inind. “Eya’,” ikido. “Aya’aa a’aw binesi wayaabamad,” ikido. “Ginookwezigemin imaa gii-piindaakoojigeyan, awas oga-izhiwidoon akeyaa ishpiming ge-izhi-baayaasing miinawaa booniimangiban imaa akina ge-izhi-biishkaasigiban o’ow,” ikido. Daaweshkesh igo eyaawaad gidewe’iganag, gaawiin wiikaa booniimagasinoon eta noo o’ow. Debwe gwek bi-izhaamagad miinawaa iwidi akeyaa miinawaa ishpiming.

[48] Mii ingiw dewe’iganag, gimishoomisinaanig begijigejig i’iw weweni biindaakoonangwaa weweni bimiwinangwaa. Weweni ongow, mii ingiw binesiwag i’iw genawenjigejig. Ganawendaagozi sa go anishinaabe gegoo go, gegoo zhawinendaagozid i’iw gagwedwed gagwejimaad iniw manidoon o-biindaakoojiged. Mii i’iw wenji-ganawinendaagozid a’aw anishinaabe gegoo. Mii go gaye gaa-onji-gikendamaan. Mii go wenji-gikendamaan i’iw akiwenziiyag gii-pi-waawiindamawiwaad gegoo.

Dibendaagoziwin

[49] Akina sa go wiindamoonaan, gaawiin gegoo wiindamawisiiwaaban ingiw akiwenziiyag. Gaawiin gaye gidaa-wiindamoosiinoon, gaawiin sa go gaye gidaa-nagishkoosiinoon iwidi gii-pi-ganoonigooyaan ji-wiidookawagwaa ingiw Gaa-waababiganikaag dewe’iganan gii-pi-gagwejimiwaad. “Enh. Giga-wiidookooninim,” ingii-inaag. Miish i’iw bi-dagoshinowaad ingiw, ingiw gwiiwizensag