• Choose a category
• All
• Classic-Fiction

By Root 473 0

waa-pi-gagwejimiwaad. “Gidaa-wiidookooninim ji-maajiishkaayaang iwidi dewe’igan iwidi ginwenzh gaa-abid iwidi. Geget noongom ikidowag dash gii-wiindamawiwaad i’iw gaa-izhiwebak o’ow gii-noondawind ko dewe’igan imaa de-madwewed imaa gaye wiin. Gaawiin o’ow, gaawiin imaa anami’ewigamigong daa-ayaasiin. Gaye gii-kashkendamoog imaa ingiw manidoog, debendaagozijig gaa-onji-wiikwajiwaad gimishoomisinaan ji-gowi’aawaad imaa. Mii sa geget gii-kowi’aawaad iwidi. Miish i’iw gaa-izhi-wiindamawag. “Enh. Giga-wiidookooninim,” ingii-pi-inaag, mii ongow gwiiwizensag o’ow isa ge-bimiwinaajig noongom iniw dewe’iganan. Ingiw ogimaag gii-pi-gagwejimiwaad miinawaa go niigaani-niimiwed gii-pi-gagwejimid. “Enh. Giga-wiidookooninim,” indinaag. “Iwidi o’ow gagwejimig a’aw nanaandawii’iwewinini a’aw. Ogikenimaawaan onow dewe’iganan,” ingii-igoog. “Gaawiin,” ikidowag. “Haaw. Mii sa gagwejimig a’aw nanaandawii’iwewinini,” ikidong. Mii sa gaye gii-wiindamaagoowaad. “Naanig o’ow bi-zhoonig,” iwidi gii-igooyaan. Miish i’iw gii-wiindamaagooyaan i’iw nanaandawii’iwewinini. Mii gaa-tinowaad o’ow iwidi Neyaashiing eyaad. Mii a’aw bwaanzhii-dewe’igan gii-ikido daga. Miish gii-pi-wiindamawiwaad. Haanh, miish gii-ikido’amawagwaa ezhinaagwak miinawaa gii-atooyaang iniw nagamonan. Gegoo miinagwaa aanish noongom ge-awi-bimiwidoowaad. Mii imaa, mii iko gaa-oozhendamaan i’iw gii-maajiishkaayeg dewe’igan bimiwineg sa go gaye wii-chawezhendamaan ji-minwendamaan sa go wii-ayaad a’aw dewe’igan iwidi. Gaawiin daa-gii-inenaasiin a’aw. Gidaa-gii-pimiwinaawaa igo. Ingiw gegoo gaa-izhichigewaad ingiw gaa-pimiwinaajig, gii-azhe-asaawaad. Miinawaa imaa gaawiin da-gijigesiiwag i’iw. Gaawiish gijigesiiwag o’ow isa gii-maajii-bimiwinaawaad iniw.

[50] Mii sa go noongom i’iw, noongom igo wenji-minwendaagozing iwidi. Mii sa go wenji-gikending a’aw dewe’igan nagishkodaadiyang igo gaye ongow owidi weshki-maajiitaayaang iwidi gii-kikinoo’amawagwaa iniw nagamonan. I’iw nakweshkodaadi-nagamon ayaamagad gaye, nakweshkodaadi-nagamon weshki-ayaawaad oshki-nakweshkodaadiwaad igo. Mii a’aw akiwenzii ge-izhi-gikinoo’amawid i’iw. Gaawiin igo aapiji indaa-izhi-mikwendanziin igo. Naagaj igo inga-mikwendaan sa go i’iw. Indaa-mikwendaan miinawaa, miish i’iw nakweshkodaadi-nagamon ezhinikaadeg. Gaawiin igo indaa-izhi-mikwendanziin azhigwa i’iw. Ayaa. Indayaan igo imaa. Niwenda-igoomin i’iw. Gaawiin indaa-gikendanziin i’iw niin. Mii nitam iwidi, nitam iwidi oshki-ayaad a’aw dewe’igan, oshki-maajiishkawangid sa go.

[51] Mii o’ow apii i’iw gii-waabamaawaad ingiw gichi-aya’aag iniw migiziwan niiwin gii-izhibaashkaanid imaa gii-asangidwaa, gii-asangidwaa sa debendaagozijig o’ow omaa dewe’iganing akina go. Mii imaa gii-waabamaawaad niiwin iniw migiziwan gii-izhibaashkaanid imaa Gaa-waababiganikaag zaaga’igan ezhinikaadeg. Mii imaa gaa-tazhi-niimi’idiiyaang nitam gii-wiidookawagwaa sa. Niin ingii-namadabi’aa a’aw niigaani-ogimaa booch ezhichigewaad o’ow ge-namadabi’aawaad iniw. Mii ge-ishkwaa-namadabi’ag, miish akina gaye gaa-paa-izhi-namadabi’aawaad gii-kikinoo’amawangidwaa. Miish megwaa go baa-gikinoo’amawagwaa baa-asaawaad iniw ge-dibendaagozinid o’ow apii. Mii imaa gii-izhi-baabasowaad ingiw niiwin, ingiw migiziwag. Gaye gii-shawendaagoziwag ongow anishinaabeg iwidi eyaajig. Ingoding igo gaa-izhi-maamaajaawaad waasa iwidi wending akeyaa izhaawag niiwin igo wending gaye gaa-onji-izhichigewaad. Gaye iwidi akeyaa wendaabang, mii iwidi niigaani-manidoo eyaad, mii a’aw. Mii ingiw migiziwag, mii iwidi dibishkoo go ingiw binesiwag, ingiw binesiwag. Mii gii-paa-wiindamaagewaad; dewe’igan aandi eyaad. Mii gaa-onji-maamaajaawaad i’iw manidoon iwidi gii-paa-wiindamawaawaad dibishkoo go oshkaabewisag gii-paa-wiindamaagewaad imaa gii-waabamaawaad iniw imaa gii-oshki-bakite’wind a’aw dewe’igan; gegoo gaa-izhiwebak dash iwidi sa gaa-chawaazhendamaan gii-chi-minwendamaan sa go gii-maajiishkaayang a’aw dewe’igan gii-wiidookaazoyaan ji-maajiishkaayang iwidi dewe’igan. Mii go noongom igo gichi-apiitendamaan i’iw gii-wiidookawagwaa gwiiwizensag sa go iwidi ji-maajiishkaawaad iniw dewe’iganan o’ow apii jibwaa-giizhiikawangid