• Choose a category
• All
• Classic-Fiction

[52] Ingii-pi-maakojii. Ingii-pi-maakowenan. Bezhig waakaa’igan gii-ayaa. Mii imaa gii-pawaanag a’aw dewe’igan iwidi ezhi-abid imaa niisidoowinigoowag, mii iwidi. Gaawiin igo onjida indinaabandanziin i’iw dewe’igan i’iw ji-wiidookawagwaa gaa-onji-inaabandamaan i’iw. Mii sa gaa-inendamaan i’iw. Miinawaa noongom gaa-asangid a’aw noongom imaa dewe’iganing a’aw ogichidaa gii-asangid noongom. “Gigii-ayaa na imaa gii-asangid?” “Enh.” “Ogichidaa?” Gaye ingii-pawaanaa gaye a’aw oshki-inini. Ingii-tago-bawaanaan iniw dewe’iganan bimi-wiidookaazod. Gaye ingii-inendaagoz i’iw. Owii-inenimigoon iniw manidoon miinawaa iniw waa-inaabishkawaajin i’iw ji-inaabandamaan i’iw weweni ji-bi-bimiwinaad. Mii gaa-waawiindamawag a’aw oshki-inini. O’ow isa naa gaye miigaadiwin gaye iwidi gii-ayaa. Gegoo gaye ingii-wiindamawaa, “I’iw gijipizon onagamon, mii gaye ezhi-niimikamowaad ingiw ogichidaag. Mii i’iw aanishinaa ogichidaa-nagamon i’iw akina go.” Mii i’iw gaa-izhi-wiindamawag. “Gaawiin igo memwech i’iw eko-niizhing gidaa-niimi’isiin,” indinaa. “Mii i’iw akina ge-izhi-niimikaman binaa go gijipizon,” indinaa. “Gaye miinawaa go ingoji go gegoo ingoji go dewe’igan a’aw bwaanzhii-dewe’igan madwewed gikenimigooyan i’iw ogichidaawiyan, mii ezhi-wiidookaazoyan dibi go.” Mii gaa-izhi-wiindamawag a’aw oshki-inini weweni ji-wiidookaazod i’iw jibwaa-migosig sa go i’iw gegoo go ingoji aabadizid a’aw dewe’igan.

[53] Mii gegoo gaye, mii go gaye a’aw Medwe-ganoonind gaa-pi-waawiindamawid i’iw. Mii i’iw. Gegoo gaye a’aw dewe’igan opwaaganan odayaawaan. Gegoo akina ongow, akina ongow akina go debendaagozijig, mii go ezhi-opwaaganiwaad. Awegwen igo bemiwinaad, mii ge-izhi-bimiwinaad igo iwidi opwaaganan. Mii i’iw. Akina go gidayaamin miinawaa go opwaagan inashke izhi-ayaayang go opwaagan ingoji wii-pimiwinad dibi go. Gaawiin gaye, booch igo weweni akawe ji-giizhi’ad a’aw opwaagan i’iw ji-biindaakoonad gaye miinawaa ji-ombaabasod gaye. Mii i’iw ezhi-aabaji’ind. Namanj igo gegoo go ge-izhi-gagwejimad a’aw opwaagan ji-izhi-wiidookaak. Mii go gaa-igooyaan i’iw, Medwe-ganoonind gaa-izhid. Mii i’iw akina; mii i’iw wenji-gikendamaan gegoo sa i’iw. Gaawiin go i’iw akina indaa-izhi-gikendanziin i’iw. Gegoo dewe’igan moozhag niibowa ingikendaan. Ingiw dewe’iganag ingikenimaag. Ingii-inendaagoz i’iw oshki-bi-wiindamawiwaad ingiw akiwenziiyag o’ow weweni. Mii sa wenji-gikendaasoyaan sa go.

[54] Gegoo gaye ongow ayaawag ogichidaag. Niigaani-ogichidaa, mii i’iw dibishkoo a’aw gijipizon bemiwidood. Mii i’iw akina go gaye ge-izhi-izhichiged imaa o’ow dewe’igan enangizod. Mii go ezhi-ogichidaawid, mii go ezhi-oshkaabewisiwid, mii go gaye niimi’iwewininiiwid akina sa go gaye gii-izhi-gaagiigidopan gaye. Mii ingiw ogichidaag enangizowaad. Miinawaa-sh aanind ongow ogichidaag ogii-pi-ani-asaawaan iniw bemaadizinijin. Mii wenji-ogichidaawiwaad gii-shimaaganishiiwiwaad gaye. Mii wenji-ogichidaawid o’ow a’aw anishinaabe omaa o’ow gaye.

[55] “Gigikendaan ina wiikaa i’iw bangisinjiged awiiya imaa de-bi-izhichigeyang?” Bangisinjiged gaye maagizhaa gaye miigwan bangishimod maagizhaa gegoo go bangisidooyan igo imaa niimi’idiing, booch igo ji-gii’imod a’aw wiin a’aw ogichidaa. Omamoon dash a’aw ogichidaa. Gaawiin gaye obiinisigawadashamoosiin gegoo ogichidaa. Bangisidood awiiya, awiiya gaawiin odaa-izhi-mamoosiin. Gaye imaa azhemayishin ezhi-niimikang a’aw o’ow nagamon a’aw ogichidaa. Namanj igo apii ogichidaa—niizhing, nising, niiwing—namanj igo apii enangizod, maagizhaa gaye gijipizon bemiwidood eyaad imaa. Miish i’iw ge-izhibaashimod imaa dewe’iganing miinawaa-sh imaa gii-pangisijigaadeg. Mii miinawaa ezhi-giizhibaashkang, niiwing ezhi-giizhibaashkang gaa-pangisijigaadeg, mii miinawaa ezhi-izhaad i’iw dewe’iganing ezhi-mamood i’iw ezhi-izhaad ezhi-mamood i’iw baaga’okwaan. Mii dash ezhi-mamood i’iw. Miish i’iw gegoo ezhi-mamood. Miish i’iw baaga’okwaan ezhi-giishkizhang, mii gegoo, akina gegoo. Miish ge-izhiwebak gegoo akina gaye gii-mamood. Mii akina gegoo giishkizhang iwidi gii-maajii-izhiwebak. Gii-maanzhii-izhiwebizid a’aw bengisijiged gegoo, gegoo