• Choose a category
• All
• Classic-Fiction

By Root 384 0

sa go ji-maanzhi-izhiwebizisig gegoo sa go zaagimijayi’ii go ji-giishkizhang a’aw ogichidaa. Mii enangizod a’aw ogichidaa. Mii ge-izhi-gaagiigidod gaye, namanj igo gashkitood. Mii enangizowaad ingiw ogichidaag akina go, mii ingiw maamawi dibishkoo a’aw naagaanizid ogichidaa.

[56] Miinawaa go dibishkoo wiinawaa go gaye ingiw, ongow oshkaabewisag, mii ingiw bemiwinaajig iniw asemaan. Mii inag. Aanish naa mii a’aw anishinaabe maamawi-niigaanizinid iniw asemaan. Mii a’aw naagaaned asemaa, mii i’iw oshkaabewis bemiwinaad. Mii go gaye a’aw oshkaabewis, awegwen sa go omaa ongow, awegwen igo omaa debinendaagozid o’ow omaa, niimiwewininiwag omaa, oshkaabewisag, ogichidaag, awegwen igo, mii go abiigizigewininiwag, mii go opwaaganan ezhi-zaka’awaapan, awegwen igo, gaawiin igo memwech opwaaganiiwinini, mii go awegwen igo ezhi-gagwejimaad ayaasig a’aw opwaaganiiwinini, awegwen igo. Mii go ezhi-bima’adoowaad. Miinawaa-sh weweni obimiwinaan gaye onow opwaaganan.

Bizindamowin Miinawaa Gaagiigidowin

[57] Ganabaj igo gigii-wiindamoon iko mewinzha aya’aa. Indaa-inendam igo. Ganabaj gidaa-gii-wiindamoon. Gaawiin giishpin gigii-wiindamoosiinoon gaye bijiinag go ji-gikendaman, ji-gikendaman sa go o’ow wenji-atooyaan o’ow ji-inendaman i’iw gegoo go. Ingoding igo bizindaman igo, mii ge-izhi-gikendaman oshki-ayi’ii igo o’ow gegoo sa go booch igo, booch igo dazhimag a’aw manidoo gegoo omaa gaagiigidoyaan o’ow gaa-pi-izhiwebak, gaa-izhiwebiziyaan, gaa-pi-izhiwebiziwaad ingiw ingitiziimag, ingiw akiwenziiyag, akina sa go. Ingoding igo inga-waawiidookaagoo ji-minji-mikwendamaan igo o’ow ezhi-waawiidookawid a’aw giijanishinaabem. Mii wenji-inendamaan i’iw ji-wiidookawag inendaagozid a’aw anishinaabe. Miinawaa go ongow, weweni ongow, weweni ongow ji-wiidookawadwaa gaye giin giijanishinaabeg gegoo o’ow gagwejimikwaa gikendaman gaye wenji-gikendaasoyan sa go. Mii wenji-waawiindamoonaan o’ow gegoo go. Ingoding gegoo giga-wiindamoon. Mewinzha go gigii-wiindamoon i’iw, gigii-wiindamoon giin igo ji-gaagiigidoyan gashkitooyan. Gigii-wiindamoon igo i’iw booch igo. Gaye aaningodinong gaye gaawiin indaa-gashkitoosiin ji-izhaayaan iwidi Gaa-waababiganikaag. Gaawiin gegoo, gegoo sa go imaa, gaawiin gegoo gidaa-gikendanziimin igo. Inga-ikid ji-izhaayaan iwidi naano-giizhigak. Maagizhaa gaye gaawiin indaa-izhaasiin. Maagizhaa gaye da-biigodaabaane. Namanj iidog. Gigikendaan ina? Booch igo, booch igo ji-gashkitooyan ji-bimiwidooyan o’ow akina go gaagiigidoyan miinawaa go ezhichigeyan akina go ezhi-gikendaman i’iw. Mii wenji-waawiindamoonaan i’iw gaye. Giin eta go gaye gidaa-gii-nisidotaan. Miinawaa i’iw weweni gigaagiigid. Mii gaa-onji-minwendamaan i’iw gii-ikidoyan i’iw ji-gaagiigidoyang o’ow dibi gegoo ekidoyaan.

[58] Maagizhaa gaye geyaabi go omaa gaasiidibeyang indayaan waa-kaagiigidoyaan. Miinawaa niin nimooshkinadoon igo naanan, ningodwaaswi gaye. Gaye inendamaan azhigwa i’iw gegoo, gegoo i’iw akiwenzii ikidoyaan apiish ayaamaambaan i’iw dinowa. Gayesh, mii azhigwa omaa gikendaagwak omaa i’iw ji-gashkitooyaan omaa gaagiigidoyaan omaa ji-bizindawiyan, ji-bizindawiwaad sa go ingiw awegwen igo ongow anishinaabeg ji-ani-gikendaasowaad gaye. Gaye gizaagi’igoomin. Gizaagi’igoomin i’iw wenji-gashkitooyaan o’ow ji-gaagiigidoyaan omaa sa. Obi-ani-wiidookaagoon igo gegoo go waawiindamoonaan sa go apane.

[59] Mii gaye weweni gaa-izhid a’aw akiwenzii gaye. “Gaye gaawiin imaa. Awi-gikendan igo omaa wiindamoonaan. Mikwendan igo weweni go. Gego naa gaye wiikaa wanendangen,” ikido. Gaawiin igo apane omaa indaa-ani-ayaasiin, mii ji-ayezhinood. Gaawiin wiikaa apane omaa indaa-ani-ayaasiin. Booch igo giin omaa ji-ani-gikendaman i’iw. Mii wenji-waawiindamoonaan giin. Gego-sh wiikaa wanendangen. Gego wiikaa ani-wanendangen ji-wiidookawad a’aw giijanishinaabe awegonen igo gagwejimigooyan. Gego naa wiikaa zhaagwenimoken, gaawiin wiikaa, gaawiin ji-inad o’ow. Gegoo sa go ji-wiidookawag inendaagozid. Moozhag gaye, moozhag gaye nimiigwechiwitaagoz i’iw bizindawiwaad ingiw niijanishinaabeg o’ow gegoo o’ow omaa gegoo ezhi-bizaaniyaawaad iko imaa niimi’idiing ingiw anishinaabeg bizindawiwaad.